Skip to main content

Kangerlussuarmi ukiuni 50-ini nunaqavissunik sulisoqarneq

Ukiut 50-it qaangiupput kalaallit siulliit Kangerlussuarmi sulilermata. Tamanna Kangerlussuarmi Sisimiunilu malunnartinneqassaaq 

Kalaallit siulliit Kangerlussuarmi sulilernerannit ukiunik 50-inngortorsiorneq Kangerlussuarmi Sisimiunilu malunnartinneqassaaq.

Taamanikkut sulilersut ilaat pingasut suli inuupput, tamarmillu nalliuttorsiornermi peqataassapput.

jens Kleist novembarip 29-anni Kangerlussuarmi kaffisoqatigiinnermi nereqatigiinnermilu peqataassaaq, tamatumani ilaatigut ilagissallugit Qeqqata Kommuniani borgmesteri Hermann Berthelsen, aammalu ineqarnermut, attaveqarnermut angallannermullu Naalakkersuisoq Jens B. Frederiksen.

Kaffillernermut kikkut tamarmik tikilluaqquneqarput, tamannalu pissaaq Kangerlussuaq Cafeteriami nalunaaqutaq 16-imiit 18-imut, Jens B. Frederiksen oqaluttuarpoq.

Kransiliinissaq
Tamanna ullunik sisamanik sioqqullugu, sapaammi novembarip 25-anni, Sisimiuni nalunaaqutaq 13 kransiliisoqassaaq, Jens Absalonseniugaluaq Hans Mathiasseniugaluarlu eqqaaniarlugit. Kingorna Taseralimmi kaffillertoqassaaq nalunaaqutaq 14-imiit 16-imut. Aaqqissuussinermi tamatumani ukiut 50-it matuma siornatigut sulisuusimasut suli uumasut pingasut tamarmik peqataassapput.

Kangerlussuaq 1941-mi oktobarip 7-anni tunngavilerneqarpoq US Air Force-mit, tassalu ukiut 71-it sinnilarlugit atuussimalluni. Ukiut siulliit 20-t Kangerlussuaq sakkkutooqarfiinnaasimavoq, taamaasillunilu piffissangaatsiaq ingerlareersoq aatsaat kalaallit siulliit tassani sulilersimapput.

Aatsaat 1962-imi januaarimi kalaallit siulliit atorfinitsinneqarput. Johan Ole Absalonsen aamma Jens Absalonsen nerisassanik pilersuinermik sulisussaasimapput, Hans Mathiassenillu maskinværkstedimi sulisimalluni. Ukioq taanna marsimi Jens Kleist nerisassanik pilersuiffimmi atorfinitsitaavoq. Elias Kajussenili errorisarfimmi atorfinitsitaalluni.

Periuseq iluatsilluartorujussuuvoq
Johan Ole Absalonsen, Jens Kleist aamma Elias Kajussen suli uumapput.

Jens Kleist eqqaamannippoq:

- Suliassanut allanut sukkasuumik qaffappugut soorlu portøritut, timmisartunik assigiinngitsunik usingiaasutut usilersuisutullu. Taavalu assersuutigalugu nerisassanik pilersuiffimmi atorfivut kalaallinit allanit tiguneqarput. Sukkasimaqaaq, sivitsunngitsorlu Kangerlussuarmi sulisut kalaalerpassuanngorpugut.

- Isumaliutaasimavormi kalaaliunerusut mittarfimmi sulissasut, oqartariaqarporlu periuseq iluatsilluartorujussuusimasoq, Jens Kleist oqaluttuarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER