Angalaneq ulorianartorsiorfiusoq misissorneqassaaq
Disko Linep ilaasartaataani, ilaasut malillugu silarluttumi radareqarani angallassisimasumi, pisimasoq Jens B. Frederiksenip aarlerinartoqartippaa. Qanoq iliorniarnersoq takujuk
Jens B. Frederiksenip paaserusuppaa qanorpiaq pisoqarsimanersoq Disko Linep ilaasortaataa Amaroq, Aasiannit Ilulissiarmat radareqarani taarsiartortoq malleqisorlu.
- Naalakkersuisoqarfiga qinnuigisimavara Imaani Angallannermut Aqutsisoqarfimmut, tamatumani oqartussaaffeqarfiusumut, saaffiginneqqullugu pisimasoq peqqissaartumik misissorneqarniassammat, angallannermut Naalakkersuisoq oqarpoq.
Atuaruk "Inuunerat ulorianartorsiortinneqarpoq"
Ilaasartaammut ilaasut malillugit sumiissusersiutinik atortoqarani angalaneq ajorluinnartumik kinguneqarsinnaasimavoq. Isikkivilussimasoq ilaasartaatillu ikkarluit arlallit qanittuararsuullugit saneqquttarsimavai.
Jens B. Frederiksenip erseqqissarpaa kinguneqaataasinnaasunik oqalunnissamut siusippallaartoq:
- Siumut inerniliinianngilanga, ilaasulli paasissutissiineri pissutigalugit pingaaruteqarpoq qulaajassallugu qanorpiaq pisoqarsimanersoq. Suliassaq tamanna Imaani Angallannermut Aqutsisoqarfiup suliassaraa. Maannangaaq erseqqissaannarsinnaavara ingerlatsisut soorunami isumagisassarigaat sullissinissamik isumaqatigiissutip illersorsinnaasumik naammassineqarnissaa, taanna oqarpoq.
Ilaasartaat Amaroq angalasimavoq qulinik ilaasoqarluni marlunnillu inuttaqarluni.