Kuupik akilluni tikeraassaaq
Aatsaat siullermeertumik naalakkersuisut siulittaasuat qaammatip tulliani Koreamut kujallermut pisortatigoortumik tikeraassaaq
Kuupik Kleist decembarip 12-aniit 15-ianut Korea kujallermut tikeraassaaq, taamaalilluni naalakkersuisut siulittaasuat nunatsinni naalakkersuisut siulittaasorisartagaannit siullersaalluni kangiani nunamut tikeraassaaq.
Tikeraarneq pissaaq Korea kujallermi præsidenti Lee Myung-Bak septembarimi nunatsinnut tikeraareersorlu.
Kuupik Kleist aatsitassanut inuussutissarsiornermullu naalakkersuisumit Ove Karl Berthelsenimit ilinniartitaanermut ilisimatusarnermullu naalakkersuisumit Palle Christiansenimit kalaallinillu suliffeqarfiutinillit ingiallorteqassaaq.
Greenland Today naapertorlugu tikeraarnermi nipilersortartoq Nive Nielsen tusarnaartitsissaaq aammalu nerisassanik, atisanik, takornariaqarnermik nipilersornermillu tuniniaanissamut saqqummersitsisoqassalluni.