Ajornikuniilluni ajorpoq
Finn Lynge Frederiksen aamma HIK ukioq manna 1. divisionini unammiuaarnermi ajorsartuarput unamminerisa qulingiluassaat aamma ajorsarnermik inerneqarpoq
HIK manna tikillugu aqqanileriarluni unammivoq. Ajorsarnerit qulingiluat, ataasiarluni ajugaaneq naligiinnerlu ataaseq. Unamminerit kingulliit pingasut ajorsarujussuarput. Tallimanngornermi Ajax København unammigamikkut 38-22-mik ajorsarluti, Team Sydhavsøerne 28-13 aamma HC Midtjylland unammigamikku 38-29 ajorsarlutik. Unammisartut divisionip naqqarpiaaniipput taamaallaat pingasunik pointeqarlutik.
- Tullissaanik unamminissarput eqqarsaatigalugu piffissaq tamaat qiimmaniarpugut. Naak unamminerit amerlasuut ajorsarnikuugaluarluta unammiartortarpugut ajugaaniarluta, Finn Lynge Frederiksen Sermitsiaq.AG mut oqaluttuarpoq nangillunilu.
- Tulliani Stoholm unammissavarput taakkua aamma ajornikut akornanniipput, qujanartumillu ajugaanissatsinnut periarfissaqavippugut.
Finn Lynge Frederiksen perngaamik 1. divisionimi arsartuuvoq. Tamanna tunuliaqutaralugu manna tikillugu ajunngitsumik ingerlavoq, naak unamminerit ilaanni arsaqataanera sivikittaraluartoq, saamimmi inissaq 17-inik ukiullip pikkorilluinnartup Magnus Landin-ip aamma inigimmagu.
Manna tikillugu Finn Lynge Frederiksen qulingiluanik isertitsisimavoq.
Finn Lynge Frederiksen sapaatip akunneranut sisamariarluni sakkortuumik sungiusartarpoq. Ajoraluartumik assammik arsaaffimmi akunnerpassuit atukkat ujalluni aseruuttoornermik pilersitsisimapput, taamaakkaluartoq Finn Lynge Frederiksen arsartuarsinnarpoq.
- Juullimi unikkallarnissaq qilanaarnarsiartorpoq nukittorsaannarluta nissugut uninngatissagatsigit, Finn Lynge Frederiksen Sermitsiaq.AG'mut naggasiivoq.
Vejle Håndbold
Akutaaneq Kreutzmann aamma Vejle Håndbold, sisamanngornermi unnukkut unammipput. Herningimut unammigamik naligiipput 20-20. Akutaaneq Kreutzmann tallimanik isertitsivoq.
GOG
GOG, sapaammi ualikkut Team Vesthimmerlandimut unammiartoramik tupaallaataasumik ilungersuanartorsiorput. Unamminermi naligeeqaluni ingerlanneqartumi Fynimiut 28-26-mik ajugaaqqarput.
Naak sakkortugaluartoq sungiusaasuuneq Jakob Larsen Sermitsiaq.AG-mit oqaloqatigineqarluni naammagisimaarinnippoq.
- Unamminerup ingerlarnerani iluatsitsinerliorpugut aamma unamminerluppugut. Qujanartumik pisariaqalermat eqqissilluta immaqalu aamma silatusaarnerusinnaagatta unammineq uagutsinnut iluaqqutissanngorlugu ingerlapparput.
Sapaammi unamminerup kingorna GOG 1. divisionimi suli ajugaaffigineqarani siullerpaajulluni inissisimavoq.
Minik Dahl Høegh sisamanik isertitsivoq.