Timi Asimi-p inuusuttut kajumissaarpai
Inuusuttut TIMI ASIMI-meersut Nuummi Qatserisartuni ikuallannermi qamiterinermik pikkorissartinneqarput angusillutillu
Inuusuttut suliniummit, Kommuneqarfik Sermersuumit Namminersorlutillu Oqartussanit tapiiffigineqartumit, Timi Asimi-meersut sapaatit akunnerinik 13-inik sivisussusilimmik sammisaqartinneqarlutillu unammilligassinneqarput.
Sapaatip akunnerani qaangiuttumi inuusuttut ikuallattumik qamiterinermik, annaassiniarnermik qamisaariaatsimillu pikkorissartinneqarput.
Sapaatip akunnerani tullermi Timi Asimi Kangerluarsunnguami illuaqqat ilaanni unnuiartortitsissaaq, pinngortitamik ukiullu silaanik atugaqartitsilluni.
- Inuusuttut ataqatigiilluarlutillu nukissaqartorujussuupput, TIMI ASIMI-lup sammisaqartitsinerani inuusuttut peqataasut 13-it uppernarsaqqippaat inuusuttut ullut tamaasa inuunermik pisoqarfiusumik sammisaqarfiusumillu aatsaat taama atorfissaqartitsitigisut, Kim Godtfredsen suliniummik ingerlatsisoq oqarpoq.
Timi Asimi-mi sammineqarput inuusuttut 15 aamma 18 akornanni ukiullit, atuarnermik suli sungiussisimanngitsut.