- Issittumi oqimaaqatigiinneq mianernartoq
Issittumi isumannaassutsikkut politikkikkut oqimaaqatigiinneq maannakkorpiaq mianernarpoq, kontreadmiral Nils Wang, Kalaallit Nunaata Danmarkillu akornanni pitsaanerusumik attaveqatigiittoqarnissaanut kaammattuuteqartoq, oqarpoq
Issittumi isumannaallisaanikkut politikkikkut oqimaaqatigiinneq mianernartoq maannakkorpiaq atuuttoq Danmarkip Kalaallit Nunaatalu akornanni pitsaanngitsumik attaveqatigiittoqarneranit aarlerinartorsiortinneqarsinnaavoq, illersornissamut ilisimatusarfiup Forsvarsakademip pisortaa Nils Wang ullumi Weekendavisenimi apersorneqarluni oqarpoq:
- Issittumi isumannaallisaanikkut politikkikkut oqimaaqatigiinneq maannakkorpiaq mianernarpoq. Kisianni Kalaallit Nunaat Danmarkimit avissaariartortutut susassaqartunit avataaneersunit isumaqarfigineqalerpat tamanna oqimaaqatigiinnermut akornutaasinnaavoq. Kalaallit Nunaanni patajaassuseqartoqarnissaa nunat tamarmik maannakkorpiaq soqutigisaraat. Taamaanngippat aatsitassarsiornermi siunissamut ungasissumut aningaasaliissuteqartoqarnissaanik kajungilersitsisinnaanavianngilaq. Issittumi eqqissineqarnera akaareqatigiittoqarneralu kikkunnit tamanit oqaatigineqaqattaarpoq. Kisianni oqimaaqatigiinneq mianernarpoq, oqarpoq.
Nils Wang naapertorlugu pitsaanngitsumik attaveqatigiinneq naalagaaffeqatigiinnerup ajalusoorneranik kinguneqarsinnaavoq - taamalu Issittumi isumannaallisaanikkut politikkikkut oqimaaqatigiinnermut aarlerinartorsiortitsisinnaalluni.
Ataqatigiinneq ingerlalluanngitsoq
Attaveqatigiinnerli pitsanngorsarneqassappat susoqassava?
- Tamanna oqaatigiuminaappoq. Kisianni oqaloqatigiinnerup maannakkorpiaq pitsaannginnera maluginiarsinnaavarput. Angajoqqaat ingerlalluanngitsut inuusuttuaqqamut aqukkuminaatsumut attaveqarnerannut eqqaanarsinnaavoq. Oqaatigineqartut tamarmik paatsoorneqarsinnaapput. Isumaqarpunga Kalaallit Nunaat inuusuttuaqqamut aqukkuminaatsumut assersuunneqarsinnaanngitsoq. Kisianni Danmarkip Kalaallit Nunaatalu akornanni pissutsit taamatut ineriartorsimapput pissutsit toqqaannartumik oqaatigissanagit oqaloqatigiittoqartarmat.
Qallunaat naalagarsiortut
- Uagut Danmarkimi naalagarsiupajaarpugulluunniit Kalaallit Nunaatalu ajuallatsinnissaa ersigisorujussuullugu. Oqaloqatigiinneq pitsaasoq aatsaat pissarsiarisinnaavarput naligiissumik oqaloqatigiinnikkut. Kalaallit politikerit Kalaallit Nunaata Danmarkillu akornanni naligiinnerunissamik ujartuiuartarput. Politikerillu Atlantikoq ikaarlugu naligiillutik oqaloqatigiittarnissaannik. Kisianni pisussaaffik illuatungeriinnut tamanut atuuppoq, Niels Wang nangilluni oqarpoq.
Weekendavisenimi apersorneqarnermini Nils Wang siornatigut oqaatigereersimasamisut erseqqissaalluni oqarpoq namminersorluni oqartussaanermut isumaqatigiissummi aatsitassat (Kalaallit Nunaat) aamma isumannaallisaanermut politikkip (Danmark) immikkoortinneqarnerat tamatigut pissusissamisoortuunngitsoq.
Tunngavissat eqqunngitsut
- Isumannaallisaanermut politikkip aatsitassallu tamatigut immikkoortinneqarsinnaanerat tunngavissaavoq eqqunngitsoq. Uranimi qalluinissamut qinnuteqaammik takkuttoqarpat uranimut akuersaanngilluinnarnermut politikki allanngortissaneritsik kalaallit politikerit isummerfigisariaqassavaat. Kisianni tamatuma peqatigisaanik nunat tamalaat akornanni pisussaaffeqarlunilu isumaqatigiissuteqarpoq Københavnip oqaloqatigisariaqarneranik pisariaqalersitsisunik. Tamanna kalaallit politikerit nalunngikkaat qularinngilara. Aatsitassanut politikki tassanngaannaq isumannaallisaanermut politikkikkut kinguneqalissaaq, oqarpoq nangillunilu:
Qallunaat ilerasuuteqarnerat
- Akisussaaffik nerriviup qeqqarpiannguanut tuppoq. Kisianni nalornisoornartut tamakkua oqaluuserissallugit tamatigut ajornakusoortarpoq. Kalaallit Nunaata ajuallatsinnissaa Danmarkip ersissutigisorujussuuaa. Nunasiaatiliusimanitsinnik ilerasuuteqalissutigisatsinnik eqqarsaatinik nalusatsinnik nassataqarunarpugut. Taamaalilluta Kalaallit Nunaannut atatillugu tunuarsimaartorujussuuvugut, Niels Wang oqarpoq.