Promillit killingat appartinniarpaat

Nunat avannarllit siunnersuisooqatigiivisa aalajangiussimavaat qamutinik motoorilinnik sunilluunniit angallatinilluunniit ingerlatsissagaanni imigassamut promilli aammiissinnaasoq 0,5-miit 0,2-mut appartinneqassasoq

Nunani avannarlerni naalakkersuinermik suliallit aalajangiisinnaasuugunik qamutinik motoorilinnik angallatinillu ingerlatsisinnaanermi imigassap aammiissinnaasup annertussusaa appartissagaluarpaat, aamma nunatsinni.

Ullumikkut imigassaq aammiissinnaasoq annerpaamik 0,5 promilleuvoq, siunissamilu 0,2 promillemut appartinneqarnissaanik siunnersuut ullumi siusinnerusukkut nunat avannarliit siunnersuisooqatigiivini akuerineqarpoq.

- Siunnersuut akuerineqarmat nuannaarutigeqaara, tupamimmi imigassamillu atuineq killilersortariaqarparput kiisalu aamma peqqissutsimut inuiaqatigiillu aningaasaqarnerannut akisunerujussua, norden.org naapertorlugu nunat avannarliit siunnersuisooqatigiivini atugasissaarnermut ataatsimiititaliami siulittaasoq Siv Friðleifsdóttir oqarpoq.

Aaqqiagiinngissutaasoq
Nunalli avannarliit siunnersuisooqatigiivisa ataatsimiinneranni siunnersuut aamma akerlilerneqarpoq.

- Imigassartorsimatilluni qamutinik angallatinillu ingerlatsineq qulequtaavoq aaqqiagiinngissutaasaqisoq, taamaattumik piviusorpalaarneruvoq nunat namminneq tamanna aalajangersassappassuk, atugarissaarnermut ataatsimiititaliami ilaasortaasoq alla Finlandimmersoq Anne Louhelainen oqarpoq.

Nunat avannarliit siunnersuisooqatigiivisa aalajangiinerat nunani ataasiakkaani naalakkersuisunit akuerineqaqqaartussaaavoq promillep appartinneqarnissaata atuutilinnginnerani.

Nunat avannarliit siunnersuisooqatigiivisa aamma siunnersuutigaat nunat avannarliit 2040-mi pujortarunnaavissimassasut.

Peqqissutsimut naalakkersuisoq Agathe Fontain IA-meersoq siusinnerusukkut siunnersuuteqarpoq ukiut 15-20-t qaangiuppata nunatsinni pujortarunnaarsimassasugut.

Powered by Labrador CMS