Isornartorsiuineq: Issittumi isumannaallisaaneq paamaarunneqarpoq
Nunani avannarlerni naalakkersuisut siulittaasui Nordisk Rådimit appisaluunneqarput, Issittumi isumannaallisaaneq pillugu suleqatigiinnissamik paamaarussisutut
Issittup imartaani uuliasiorluni qillerinermi imaatigullu angallannermi isumannaallisaaneq isornartorujussuuvoq amigaatilerujussuullunilu, Nordisk Råd nalunaarpoq, nunanilu avannarlerni naalakkersuisut suleqatigiinnissamut kaammattorlugit.
- Issittoq nunani avannarlerni maani ataatsimoorussaraarput. Taamaattumik itinerusumik suleqatigiinnissami periarfissanik annerusunik naalakkersuisut takunnissinnaannginnerat eqqumiiginarsinnaavoq. Nunat soorlu USA aamma Rusland illuatungeraavut, taakkualu uatsitut nunani avannarlermiusut avatangiisinik illersuinissap eqqarsaatiginissaanik ileqqoqanngillat. Sooq taava Issittumi imminut napatinnerusumik siunissaqarnissaq qulakkeerniarlugu suleqatigiissanngilagut, Nordisk Rådimi avatangiisinut isumalluutinullu ataatsimiititaliamut siulittaasoq Ann-Kristin Johansson norden.org naapertorlugu oqarpoq.
Arriitsuinnarmik ingerlasoqarpoq
Tamatuma peqatigisaanik Nordisk Rådimi isumaqartoqarpoq isumannaallisaanerup pingaarnersiuinermi salliutinneqarnerunissaanik Issittumi Siunnersuisoqatigiiffik nunani avannarlerni naalakkersuisunit tatineqartariaqartoq. Avatangiisini ajunaarnersuaqarsinnaaneranut atatillugu suleqatigiinnissaq pillugu pituttuiffiusumik isumaqatigiissusiornissaq qularnaarunneqartariaqarpoq upalungaarsimanerlu nalinginnaasumik annertusarneqartariaqarluni, Nordisk Råd isumaqarpoq:
- Upalungaarsimanermik annertusaaq Issittumi Siunnersuisoqatigiiffik aqqutigalugu aallartinneqareerpoq. Kisianni sivisuallaamik ingerlavoq isumaqarpugullu ajoquserneq pippa saliinissamut taarsiullugu pinaveersaartitsinissaq pitsaanerujussuusoq. Taamaattumik nunani avannarlerni naalakkersuisut qinnuigaavut mianersuussinissamik isiginninniarnerup Issittumi Siunnersuisoqatigiiffimmi pingaartinneqarnerulernissaanik tatiseqqullugit, Ann-Kristin Johansson oqarpoq.