Stormip anorersuaq Sandy piareersimaffigaa
Storm Ludvigsen, IA, maannakkorpiaq New Yorkimiittup, hotelia anorersuup Sandyp nunamut pitoraannissaanut sillimaniarluni piareersimavoq. Anorersuarnissaanik aarlerisaarineq Stormip eqqissisimalluni utaqqivaa - taamaattoq anorersuarnissaanut sillimmartaarsimavoq
Storm Ludvigsen, IA ulluni makkunani FN'ip ataatsimeersuarneranut atatillugu New Yorkimiippoq. Ullumili ataatsimiinnissat tamarmik taamaatiinnarneqarput anorersuaq Sandy pissutigalugu, anorersuup USAmi illoqarfiit inuttunersaasa ilaat qanilliartorpaa taassumalu nassataanik aserortererujussuartoqarnissaa annilaanngatigineqarpoq.
- Hoteli najugaqarfigisarput annertoorujussuarmik sillimaniarfiuvoq qimannissaalu innersuussutigineqanngilaq taamattaaq igalaanut qanillattoqqusaanngilagut, Storm Ludvigsen Sermitsiaq.AG-mut oqaluttuarpoq.
Storm Ludvigsens hotelia New Yorkimi Manhattanimiippoq, tamaani inuit qimarngussuunneqarnissaat piumasarineqanngilaq. Taamaakkaluartoq anorersuup takkunnissaanut piareersarneq malunnarpoq, Storm Ludvigsen oqaluttuarpoq.
- Ullaap tungaani pisuttuarama pisinniarfiit amerlasuut matuneqareersimasut maluginiarpara. Ammasuni inuit tulleriiaartut amerlaqaat, oqarpoq.
Colassaqarluni piareersimavoq
Storm Ludvigsenip cola, imeq aamma Nescafémik anorersuarsiornissaminut eqqanaarsarsimavoq angalaqataali nerisassanik aamma pisinniarsimapput.
Storm Ludvigsenip suli paasinngilaa FN'ip ataatsimeersuarnera aqagu nangeqqinneqassanersoq.
Storm Ludvigsen kalaallinit kisiartaalluni anorersuup Sandyp aqqusaagassaanniinngilaq.
Anoreersuup eqqugassaaniittunik nalunngisaqaruit kaammattorneqarputit uagutsinnut allaqqullutit redaktion@sermitsiaq.ag