Inissiisarneq: maannakkorpiaq iliuuseqartoqartariaqarpoq
Meeqqanik inuusuttunillu sumiginnakkanik nunatta avataanut inissiisarnermik ajornartorsiut iluarsineqaqqullugu Ilaqutariinnermut Peqqissutsimullu Ataatsimiititaliamit naalakkersuisunut kaammattuutigineqarpoq
Piffissami kingullermi qassiiliortoqareersorlu Ilaqutariinnermut Peqqissutsimullu Ataatsimiititaliap ilaqutariinnermut, piorsarsimassutsimut, ilageeqarnermut naligiissitaanermullu naalakkersuisoq Mimi Karlsen, Inuit Ataqatigiit, oqaloqatigiumallerpaa.
Taama pisoqartussanngorpoq meeqqanik inuusuttunillu sumiginnakkanik nunatsinni isumaginninnissamut neqeroorutinik piukkunnartunik soqannginnera pissutigalugu Danmarkimut aallartinneqartartunik tusagassiuutit sammisaqarnerisa kingunerisaannik.
- Ilaqutariinnermut Peqqissutsimullu Ataatsimiititaliami naalakkersuinikkut tunngaviusumik isumaavoq meeqqat inuusuttullu sumiginnagaasimasut isumagineqarnissaannut kalaallit inuiaqatigiit namminneq neqerooruteqarsinnaasariaqartut, Ilaqutariinnermut Peqqissutsimullu Ataatsimiititaliamut siulittaasoq Olga P. Berthelsen, IA, erseqqissaavoq.
- Taamatuttaaq meeqqat inuusuttullu ilaqutariinni toqqissisimasumik ineriartornissaat qulakkeerniarlugu inuiaqatigiittut uagut suliniuteqarneq sakkortusartariaqaripput Ilaqutariinnermut Peqqissutsimullu Ataatsimiititaliami tunngaviusumik isumaavoq.
Olga P. Berthelsen tusagassiuutitigut nalunaarummi nassuiaavoq, meeqqanut inuusuttunullu meeraneq toqqissisimanartoq pillugu naalakkersuinikkut anguniakkatigut suliniutit isumannaarnissaannut tunngaviusumik pissutsit arlallit pisariaqartut isiginiarneqarnissaat ataatsimiititaliap ilisimagaa.
Læs "Vi eksporterer vores problembørn"
Siunissami qaninnermi ungasinnermilu aaqqiissutissat
- Ajornartorsiutit tigussaasut piffissaq sivikitsoq atorlugu aaqqitassaapput, peqatigitilluguli naalakkersuinikkut anguniakkagut isumannaarniarlugit arlalinnik suliniuteqarnissaq qulakkeertariaqarparput.
- Unammiligassat tamakku naalakkersuinikkut aallutissagigut Ilaqutariinnermut Peqqissutsimullu Ataatsimiititaliamit kaammattuutigineqarpoq, taamaalilluta ineriartornerup pilerigeqisatta anguniarnerani katatarissanngilagut. Ineriartorsinnaanngilagut ilaqutariinni innuttaasullu akornanni inuuneq toqqissisimanartoq, isumaqarluartoq imaqarluartorlu isumannaarnagu, Olga P. Berthelsen allappoq itisiliillunilu:
- Ineriartorsinnaanngilagut ilaqutariinni innuttaasullu akornanni inuunneq toqqissisimanartoq, isumaqarluartoq imaqarluartorlu isumannaarnagu pinngitsaalisamik ineriartornermi inuusuttavut katakkutsigit. Inuiaqatigiit ineriartorneranni taamatut nassuerutiginninneq isiginiartariaqarparput.