Aningaaseriviup rekordiliinera atuisartunut iluaqutaassaaq
Grønlandsbankip naatsorsuutitigut angusarissaarnera atuisartunut malunniutissaaq, aningaaseriviup pisortaa Martin Kviesgaard neriorsuivoq
Ullumi siusinnerusukkut allannitsitut Grønlandsbankip tunngaviusumik ingerlatsinermini angusai (aningaasat nalingisa iluarsinnginneranni naliliinnginnernilu angusat) 2012-imi kvartalini siullerni pingasuni 89 millioner koruuniniit 106 millioner koruuninut qaffariarput.
Akileraarutit suli ilanngaatiginagit angusat 110 millioner koruuninut amerleriarput, aningaaseriviup oqaluttuarisaanerani angusat aatsaat taama pitsaatigalutik. Angusarissaarneq aningaaseriviup atuisartuisa iluaqutigissabvaat.
Atuaruk "Grønlandsbanki rekordiliinermi kingorna annertusaavoq"
Tamanna pissaaq aningaaseriviup arlalinnik pitsanngorsaaneratigut, ilaatigut atuisartunut inuinnarnut tamanut netbanki akeqanngitsoeq, inuinnaat kreditkortinut akiliutaata apparnera aammalu biilimik avatangiisinik mingitsutsinngitsumik pisaarniarnermut taartsigassarsiniarfik "Minguik".
Angusarissaarnerup aamma kingunerisaanik Grønlandsbanki inuussutissarsiutinut aningaasaliissutinut nutaanut tapersersuinissaminut piareersimavoq, tamanna aqqutigalugu inuiaqatigiinni ineriartorneq siuarsarniarliugu:
- Aningaasaliissutinut nutaanut, assersuutigalugu aalisarnermut, inissianik amerlanerusunik sananermut imaluunniit nunaqavissut ingerlatsiviisa aatsitassarsiornermi peqataanerannut tapersersuinissatsinnut inissaqartitsilluarpugut, aningaaseriviup pisortaa Martin Kviesgaard oqarpoq, erseqqissarlugulu inuiaqatigiit aningaasarsiornerisa annertusarnissaa pingaaruteqartoq:
- Inuiaqatigiinnut pingaarutilimmik aalajangiisuuvoq aatsitassarsiornermi ingerlatsilernissaq, angisuumik ataatsimik mikisunilluunniit arlalinnik.