Pinnguaat nutaaq imaatigut isumannaassutsimut qaffassaataassasoq
Pinnguaat nutaaq 'Aallaaniarneq' nunatsinni imaatigut angalanermi isumannaallisaanermut pitsanngorsaataassaaq
Kalaallit meerartaat imaatigut isumannaallisaanermut tunngasunik pinnguaat nutaaq meeqqat atuarfiinut tamanut nassiussuunneqartoq aqqutigalugu soqutiginnilersinneqassapput taamalu imaatigut isumannaallisaaneq siunissami meeqqat angalasalerpata pitsanngortinneqassalluni.
Pinnguaat taaguuteqartoq 'Aallaaniarneq' Ineqarnermut, Attaveqarnermut Angallannermullu naalakkersuisoqarfiup suliniuteqarneratigut suliarineqarpoq, naalakkersuisunullu ilaasortaq Jens B. Frederiksen pinnguaammik tallimanngormat tamanut saqqummiuneqartumik naammagisimaarinnilluinnarpoq:
- Siornatigut imarsiornerup isumannaatsuutinnissaanut suliniutit innuttaasut inersimasortaannut sammitinneqartarput. Taamaattumik pinnguaat nutaaliorneruvoq, meeqqanut siunissami angalasartussanut saaffiginnittuugami. Pinnguaat aqqutigalugu isumannaallisaanermut atortut ajutoortoqartillugu pitsaasunik inerneqartinnissaannut periarfissat annertusitinneqassapput. Aallaqqaataaniilli pitsaasumik ileqqoqarnissap ineriartortinneqarnissaata pingaaruteqarpoq pineqarpoq, Jens B. Frederiksen nalunaarpoq.
5. aamma 6. klassini atuartut pinnguaammik inerisaavigineqarsimasut pinnguaammut tiguartianissaat neriuutigaa:
- Pinnguaat Kalaallit Nunaanni pissutsinut immikkut naleqqussagaavoq. Pladi pinnguarfiusoq kangerlunnut, imaatigut angalasartuiit angallavigisartagaannut assingusuuvoq. Taamaattumik meeqqat pinnguaammut tiguartianissaat neriunarpoq. Kisiannili atuartitsissutitut allatulli iluatsilluassappat ilinniartitsisut pinnguaammik atuisarnissaat apeqqutaassaaq.