Qaqortoq tuaviussaaq
Qaqortumi mittarfiliornissamik sukkasuumik aajangiisoqanngippat illoqarfik mittarfittaanngitsuuissinnaavoq, Michael Binzer mianersoqqusivoq
Kujataani angallannerup aaqqissuussaanissaa pillugu ataasinngormat innuttaasunik ataatsimiititsisoqarpoq, tamatumanilu peqataapput Air Greenlandip pisortaanera Michael Binzer attaveqarnermullu Naalakkersuisoq Jens B. Frederiksen, Demokraatit.
Michael Binzer nassuiaavoq ukiuni tulliuttuni marlunni Kujataani ilaasunik angallassinermut helikopterit Bell 212 marluk atorneqassasut. Aappaa Qaqortumiissaaq, tassaniippat angallassinermut pilersaarut eqaannerusoq pineqarsinnaammat. Binzeip pingaartippaa pineqartoq ikaarsaariarnermi aaqqiissut, ukiut marlussuit qaangiuppata angallannermut aaqqissuussinerup ataavarnerusup pilersinneqarnissaata tungaanut.
Sukkasuumik aalajangiinissaq pisariaqarpoq
Jens B. Frederiksenip nalunaarutigaa Qaqortumi mittarfik 1799 meterinik takissusilik Inatsisartut akuerigunanngikkaat. Taarsiullugu tikkuarpaa mittarfik 1199 meterinik takissusilik illoqarfiup avannaaniittussaq, kingorna tallineqarsinnaasoq, tamatumunnga periarfissaqarmat. Michael Binzerip inassutigaa sukkasuumik aalajangiisoqassasoq, taamaanngippat mittarfittaartoqanngeratarsinnaammat, ukiuni aggersuni missingersuutit sukanganerunissaat pissutigalugu.
Assigiinngitsumik tiguneqarpoq
Ataatsimeeqataasut mittarfiliornissaq nalinginnaasumik tapersersorpaat, tamanna Qaqortormiut ukiorpassuarni kissaatigisimallugu. Allalli mianersoqqusipput, suli sorpassuit iternga tikillugu misissorneqarsimanngimmata - assersuutigalugu atlantikoq qulaallugu Kujataa qaqugorsuarmut attaveeppat takornarianut inuussutissarsiornermullu kinguneqaatissat.
Marlunngormat Jens B. Frederiksenip MIchael Binzerillu Kommune Kujallermi kommunalbestyrelsi ataatsimeeqatigaat, qinnuiagalugulu mittarfimmut siunnersuummut isummeqqullugu.