Skip to main content

- Oqaasissat kingulliit oqaatigineqanngillat

London Miningip Isukasiani suliniutaanut akerlilersuineq avatangiisinut suliniaqatigiiffimmit Nuup Kangerluata Ikinngutaanit ingerlatiinnarneqalerpoq

Nalunaarusiat »Avatangiisinut sunniutissanik nalilersuinerit« aamma »Inuiaqatigiinnut attanneqarsinnaassutsimik nalilersuinerit« London Mining Greenland A/S-ip Nuup Kangerluata qinnguani Isukasiani saviminissarsiorfimmi iluaqutiginninnissaq pillugu Aatsitassanut Ikummatissanullu Pisortaqarfimmut qinnuteqaataa tunngavigalugu siunnersuisartut suliffeqarfiinit Orbiconimit aamma Grontmijimit suliarineqartut pillugit pisortatigoortumik tusarniaaneq tallimanngornermi oktobarip 19-iani matuvoq.

Piffissap tusarniaaviusup sapaatip-akunnerinik qulingiluanik sivisussuseqartup ingerlanerani innuttaasunik ataatsimiititsinerit Kompetencekompagnimit aaqqissuunneqartut ingerlanneqarput, kiisalu ataatsimiititsinerit allat akerliussutsimillu takutitsinerit arlallit pisarlutik, kisianni tusarniaaneq tallimanngormat qaangiummat Isukasiani saviminissarsiorfik pillugu oqallinneq tamaanga killeqassanngilaq..

Suli akerliupput
Avatangiisinik illersuiniaqatigiiffik Nuup Kangerluata Ikinngutai innuttaasunik ataatsimiititsinernik sisamanik naammaginninngilluinnarpoq, taakkunani kingulleq piorsarsimassutsikkut illorsuarmi Katuami ataasinngornermi oktobarip arfineq-pingajuani ingerlanneqarluni.

- Oqartussaaqataanermik suliaq qangaammalli unittoortinneqareerpoq, innuttaasunillu ataatsimiititsinerit kingusippallaarujussuartumik ingerlanneqarput, siulittaasoq Pîtánguak' Tittussen Nuuk Ugeavisimut oqarpoq.

- London Mining Isukasiani avatangiisinik misissueqqaalermalli innuttaasut ukiut sisamat tallimalluunniit matuma siornali nalilersuinermut ilaatinneqartariaqarsimagaluarput, innuttaasut akuutinneqarnissaat pillugu namminersorlutik oqartussat malittarisassaataanni allassimasutorluinnaq.

– Nuup Kangerluata Ikinngutai tusarniaanerup tallimanngornermi matunera tunngavigalugu peqatigiiffiup siunissami suliniarnissaa oqaluuseriniarlugu ilaasortaminik ataatsimiititseqqammerpoq.

- Sakkussat pigisavut tamaasa atorlugit akerlilersueqqinniarpugut, siulittaasoq Pîtánguak' Tittussen oqarpoq.

Sakkussat tamakkua suusinnaappat?

- Tamanna kangerlummik assersuinerusinnaavoq, umiarsuit siulliit umiarsualiviup, aqquserngup aatsitassarsiorfiullu sananeqarnissaanut atortussanik usillutik Nuup Kangerluanut pulalerpata assersuutigalugu umiatsiaatileqatigiit qajartortartullu peqatigiiffiat suleqatigalugu assersuinikkut.

– Oqaaseq kingulleq suli oqaatigineqanngilaq, Pîtánguak' Tittussen erseqqissaavoq.

Paasissutissiineq ingerlatiinnarneqassaaq
Innuttaasunik ataatsimiititsinerit sisamat katillugit inunnit 475-init peqataaffigineqartut Inuussutissarsiornermut Aatsitassanullu naalakkersuisup Ove Karl Berthelsenip naammagisimaarluarpai.

- Innuttaasunik ataatsimiititsinerit tassaasimapput innuttaasut attuumassuteqartullu Isukasiani suliniummut ernummatigisaminnik ilimagisaminnillu avitseqatigiiffigisinnaasaat, kisianni innuttaasunut oqaloqateqarneq paasissutissiisarnerlu tusarniaanerup naammassineratigut unissanngillat, tassami suliniutip ingerlanera tamakkerlugu London Mining innuttaasunut oqaloqateqartuartussaavoq, Ove Karl Berthelsen oqarpoq.

London Mining Isukasiani iluaqutiginninnissamut akuersissuteqarfigineqartinnagu aatsitassarsioqatigiiffik Kommuneqarfik Sermersuumut Namminersorlutillu Oqartussanut IBA-mik isumaqatigiissuteqaqqaassaaq.

(IBA tuluttuumit Impact Benefit Agreementimit naalisagaavoq, tassaallunilu assersuutigalugu ilinniartitaaneq najukkamilu sulisartunik suliffeqarfinnillu akuutitsinissamik ingerlatseqatigiiffiup najukkami nunamilu oqartussat akornanni pingasoqiusamik isumaqatigiissut).

London Miningimut akuersereerpit?

- Naagga, naalakkersuisut suli aalajangiussaqanngillat, aamma inatsisini piumasaqaatit tamakkerlugit naammassineqarsimatillugit qinnuteqaat aatsaat akuerineqarsinnaavoq.

- Oqaaseq kingulleq suli oqaatigineqanngilaq, Ove Karl Berthelsen erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER