Naartup suiaassusia aallaavigalugu naartuersittartut amerlanngillat
Arnat ikittuinnaat imaluunniit arnat naartusut naartumik suiaassusia aallaavigalugu naartuersittarneq atorneqanngitsoq nakorsaq naliliivoq, taanna naartunik misissuinermik ingerlatsisarpoq
Ulluni kingullerni oqallisigineqaqaaq qallunaat arnartaasa Sverigeliarlutik naartuminnik niviarsiaqqanik peersitsiartortarnerat, tamanna tunngaveqarpoq Sverigemi naartuersissinnaaneq Danmarkimit kingusinnerusukkut ingerlanneqarsinnaammat.
Dansk Føtalmedicinsk Selskabimi oqallinneq tupigusuutigineqaqaaq. Ingerlatsivik tassaasoq suliamik ingerlatsisut peqatigiiffigaat Danmarkimi naartut qanoq issusiannik isumaginnittut - taakkua ajornartorsiut piunnginnerarpaat imaluunniit qaqutigorsuaq pisartutut taavaat.
- Ilisarinngilarput ajornartorsiut taamak angitigineqarmat imaluunniit ajornartorsiutaaleraluttuinnarmat, ingerlatsivup siulersuisua Olav Bjørn Petersen, oqarpoq taanna Aarhus Universitetshospital Skejbymi Gynækologisk-Obstetrisk Afdelingimi nakorsaaneruvoq.
- Ilaasortagut aperaagut ataatsillu eqqaamasaqarfigaa ukiut arlallit matuma siorna naartuersissimanera. Kisianni tusagassiivinni eqqartorneqartutuulli ajornartorsiutip annertussuseqarnera ilisimasaqarfiginngilarput, Olav oqarpoq.
Dansk Føtalmedicinsk Selskabimi ilaasortat Danmarkimi ernisarfinni pisortanit ingerlanneqartuni sulisuupput aamma namminersortunik ilaqarput.
Peqatigiiffiup Lundimi aamma Malmømi suliffeqarfiit saaffigai taakkua ajornartorsiummik issatsiaq misissuipput.
- Taakkua aamma taamannak pisoqannginnerarpaa. Taakkua ajornartorsiutaannginnerarpaat angisooq aamma naartuersikkiartortartut amerliartunnginnerarpai, Olav Bjørn Petersen oqarpoq.
Naartut suiaassusaat aallaavigalugit peersitsisarnermik oqallinneq aallartippoq naartunik misissuivimmik Lille Københavnerimik piginnittup Robert Kinnerfeltip DR'imut oqaatigaa naartut suiaassusiannik paasiniaaneq naartulernermit sapaatip akunnerisa 18-iata siorna pisartut unitsillugit, paasigamiuk taamaaliortarnerup kingorna arnat Sverigemut peersitsiartortartut.
Nakorsaq immikkut pikkorissarsimasoq Speciallæge Birgit Petterson, Abortrådimut siunnersortaasoq DR'imut oqarpoq peersitsiniarluni 'takornariartarneq' ukiuni arlalinni ilisimaneqartoq.
- Paasinnittaasera naapertorlugu peersitsisartut amerliartornissaat ilimagaara, pissutigalugu inuit nukatsitaangaaramik meerassamik qanoq ittuunissaa aamma qanoq suiaassuseqarnissaa nammineq aalajangerusuttalermassuk, Birgit oqarpoq.
Taamali oqalunneq Olav Bjørnt Petersenimit ilisarineqanngilaq.
- Uppernarsaatissanik amigaateqarpugut. Qularutigineqartariaqanngilaq meeqqat suiaassusiat pissutigalugu immikkoortinneqartassappata ileqqorissaarnermut annertuumik tunngaveqarmat, Olav Bjørnt Petersen oqarpoq.