Skip to main content

Manna pissutigalugu Kulusummi atuarfik ingerlalluarpoq

Ingerlalluarneranut pissutaasut ilagaat assassornermik fagit sammineqarluarnerat. Tassani ilinniartitsisut meeqqat assassornermik ilinniartippaat, atuarfimmi sapiuppata siunissaannik qulakkeerinnittumik 

Ullumi allaaserisami "Atuarfeeraq atugassaqarnerlukkaluarluni angusarissaartoq"-mi allannitsitut Kusummi atuarfik nunatsinni nunaqarfinni atuarfinni kisiartaalluni meeqqat atuarfiannit soraarummeersitsisarpoq. Nunamilu angusarissaarfiusarnerpaat ilagalugu.

Atuarfiup ingerlalluarneranut pissuterpassuaqarpoq, tamakkuali ilagaat assassornerup sanalunnerullu sammineqarluarnerat.

2009-mi decembarimi Københavnimi silap pissusia pillugu ataatsimeersuarnermi COP15-imi Kulusumi Alivarpimmi 6. klassimi atuartut ilinniartitsisuallu Anne-Mette Holm peqataasut nuimasorpassuit nunarsuarmit tamarmeersut ilagalugit peqataapput. Kalaallit Nunaat sinnerlugu peqataasussatut nalaatsornerinnakkut toqqarneqanngillat - qaaqquneqarsimapput pissutigalugu meeqqat sanasimammassuk "Noap qajaa", tassani nunatta miluumasui, uppik piniartorlugu qisummik kusanartorujussuarmik isikkuminartumillu sanasimallugit.

Taanna taamanikkut qallunaat silap pissusianut ministeriannut Connie Hedegaardimut nassiussimavaat, eqqaasinniarlugu ataatsimeersuarnermi Kalaallit Nunaat tapersersussagaa, tamassumalu tassa inerneraa ataatsimeersuarnermut qaaqquneqarnerat, kalaallit saqqummersitsineranni sannavimmik sulisumik takutitsillutik

Assassornikkut meeqqat imminnut ikiornerulerput
Ilinniartitsisup Anne-Mette Holmip atuarfimmi meeqqat sivisunerusumik sanalutsillugillu assassortittarpai. Tassani meeqqat kusanartunik sanatittarpai, Noap qajaatut takutissinnaasaannik tulluusimaarutigisinnaasaannillu. Angerlarsimaffii pulaarlugit tamakkua sumiiffippassuarni nivingapput. Sananerit ingerlarnga meeqqat namminneq ullorsiutimikkut uppernarsartarpaat inernerilu portfolio-minnut toqqortarlugit.

- Tamatigut atuartoqartassaaq ilinniagaqanngisaannartussanik, qularnanngitsumillu inuunertik naallugu nunaqarfimmi najugaqartussanik. Mersornerli, sanalunnerlu qalipaanerlu ilinniarsimagunikkit eqqarsaatigineqarsinnaalluarpoq ulluinnarni imminnut ikiorneruliinnaratik, aammattaarli takornarianut kusanartulianik sanaluttarsinnaasut taamalu aningaasarsiutigalugu. Aasat tamaasa takornariarpassuarnik Kulusummut tikittoqartarpoq, taamaattumik tuniniaavissaqarpoq, Anne-Mette Holm oqaluttuarpoqæ.

Anne-Mette najoqqutassiuisoralugu meeqqat sanaavi qimerlooraanni kusanartorpassuaqarpoq tunineqarsinnaasunik. Immikkut ittut, meeqqat namminerluinnaq sanaavi ersarissumik inuit kulturiannik aallaavillit. Meeqqallu angusarissaarnissaminnut tamaviaartarput. Anne-Mettep nalunngilluarpaa sakkortuujusinnaalluni.

- Meeqqat ilaat, nalunngisara pitsaanerusumik sanasinnaasoq, pipallalluni suliaqarsimappat oqarfigisarpara. Taava titartagaa igillugu aallaqqaataaniissaaq! Meeqqat soorunami ilaanneeriarlutik narrujuummertarput, ilungersorlunili suut tamarmik pitsaanerulersinnaasut takullugit naammagisimaarinninnerujussuaq ilinniartarpaat.

Atuarfiup pisortaata Lars-Peter Sterlingip aamma qularutiginngilaa misilittagaq tamanna faginut allanut sunniuttartoq.

- Tamanna atorsinnaalluarpoq, taanna oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER