Immanik itissusersiuinissaq nukingernarpoq

Nunatta imartaata ilaminiinnanngua itissusersiorneqarsimavoq. Tamassuma suliniutigineqarnera annertusineqartariaqarpoq. Tamannalu nukingernarpoq, taamatut isumaqarpoq Per Stig Møller, Konservative, taassumalu sisamanngormat Folketingip oqaluttarfianit pissutsit ernumanartoqartippai, Folketingimi Issittumi suleqatigiinneq oqaluuserineqarmat.

IA sinnerlugu folketingimut ilaasortap Sara Olsvigip konservativet oqaaseqartuanni itissusersioriaatsinut siunnersuutit ujartorpai.

Nunanut allanut ministeriusimasup Per Stig Møllerip, Arctic Five-mik, tassa naalagaaffiit Qalasersuarmut sineriallit oqaloqatiginnittarfiannik pilersitsisup, oqaaseqartartutut saqqummiussinermini issittumi pissutsinut tunniusimanersuani soqutiginninnersuanilu takuteqqippai.

- Nalunngilara pilersaaruteqartoqartoq, tamannalu pillugu isumasioqatigiissimavugut. Aammami pilersaarutigineqartumit pitsaanerusumik ingerlavoq, nukingernarporli. Ikkarluppassuaqarunarpoq ilisimanngisatsinnik, Per Stig Møller oqarpoq.

- Umiarsuilli amerligaluttuinnartut taavunnartalerput, umiarsuit takornariartaatit amerlanerusut, Kalaallillu Nunaata imartaani angalanerit amerliartorput. Taamaattumik immap assingi pigisariaqarpavut inunnik avatangiisinillu ajunaarnersuit pinngitsoorniarlugit, Per Stig Møller oqaaseqartartutut saqqummiussinermini oqarpoq.

Sara Olsvigip ujartorpaa immap 2 millioner kvadratmeterinik annertussusillip itissusersiornissaanut Per Stig Møllerip itissusersioraasissanut siunnersuutai.

- Oqaaseqartartoq siunnersuutissaqarpa itissusersiuineq atortut ullumikkut pigisavut atorlugit qanoq sukkanerusumik ingerlanneqarsinnaanersoq? Atortunik nutaanik nassaarniassaagut? Periutsinik nutaanik nassaarniassaagut? Sara Olsvig aperivoq.

Aamma atuaruk "Immanik itissusersiuineq: USA ikiuuttariaqarpoq"

Aamma atuaruk "Nunatta imartaaata itissusersiornissaanik IA nukingisaarivoq"

Nunatta imartaani angalaneq ulorianartoqaqaaq
- Eqqaamasakka malillugit Kalaallit Nunaata kimmut kujataa maanna sammineqarpoq, nalunngilluarparalu tamaani ikkarluit amerlavallaanngitsuinnaat nalunaarsorneqarsimanngitsut, Per Stig Møller oqarpoq.

- Uanga nammineq tamaani angalasimavunga. Avannarparterutta suli ulorianarneruvoq, avannarlerpaamilu silap pissusiata allanngoriartornera pissutigalugu ulorianarnerpaassaaq. Annaarpiaani Arctic Five-mi pisussaaffivut annertunersaapput, ilisimasakkalu malillugit tamassuma imartaa ilisimasakiffigisorujussuuvarput, Per Stig Møller akivoq.

Itissusersioriaatsit nutaat atorneqassapput
Nunanut allanut ministeriusimasup aamma oqaatigaa itissusersioriaatsit nutaat atorneqassasut, pissutigalugu Danmarki naalagaaffinnut sisamanut allanut Qalasersuarmut sinerialinnut imminut pisussaatissimammat immat itissusersiornissaannut.

- Ineriartornerli atorneqarsinnaasoq atorneqassaaq, pisussaaffeqaratta Arctic Five-milu tamatuminnga neriorsuisimagatta, Per Stigt Møller oqarpoq.

Timmisartut satellitsillu atorlugit itissusersiuineq
IA-meersup Sara Olsvigip oqaaseqartutut oqaaseqarnermini itissusersioriaaseq sukkanerusoq ujartorpaa, innersuussutigalugulu DTU Space-p timmsartut satelltsillu atorlugit uuttortaaneri maanna ingerlanneqartut.

- Avatangiisinulli ministerimut kajumissaarutigisimasattut qallunaat naalakkersuisui kajumissaarusuppakka itissusersiuineq pitsanngorsarniarlugu periarfissanik allanik misissueqqullugit. Timmisartut atorlugit itissusersiuinermik maanna misileraasoqarpoq, Sara Olsvig oqaaseqartartutut saqqummiussinermini oqarpoq.

- Periuseq pisariaqarluinnartumik umiarsuartigut itissusersiuinermut ilapittuutitut atorneqarsinnaavoq, tikkuussillunilu umiarsuartigut kigaatsumik akisuumillu itissusersiuinermi sorliit siulliutinneqassanersut.

- Allaat siunissami immaqa satellitsit tamatumunnga atorneqarsinnaapput, ukiunilu makkunani DTU Spacemi pissanganartorujussuarnik misileraasoqarpoq. Nuannaarutigaara avatangiisinut ministeri oqarmat ineriartorneq qanimut malinnaaffigalugu, Sara Olsvig oqarpoq.

Aamma atuaruk "Jens B.: Imaani angalanermi isumannaatsuuneq pingaarnersaavoq"

Amma atuaruk "Imartatta ilarujussua itissusersiorneqarsimanngilaq"

Imaanik itissusersiuineq raketsinut illersuummut isumaqatigiissutip ilagaa
Siumumeersoq Doris Jakobsen, Issittoq pillugu oqallinnermi najuutinngitsoq, nunanut allanut ministerimut Villy Søvndalimut, SF, allakkiaqarsimavoq immat itissusersiornerat raketsinut illersuummik USA-mik isumaqatigiissummut ilaasariaqartoq.

- Siumut sivisuumik isumaqarsimavoq raketsinut illersuummut Thulep atorneqarnissaanik USA-mik suleqatigiinnermik isumaqatigiissummut ilaasariaqartut upalungaarsimanermut immallu itissusersiornerannut USA-p ikiuunnissaa, Doris Jakobsen Villy Søvndalimut allappoq.

- Suliassamut tamatumunnga USA sakkutuut umiarsuaannik atortuutiminillu peqataasuuppat tamanna assigiinngitsilluassagaluarpoq, Danmarkillu aningaasartuutit arlallit sipaarutigissavai, Doris Jakobsen isumaqarpoq.

- Periarfissaq tamanna atorniarsiuk - allaammi amerikarmiut umiarsuaannut takornariartaatinut, imartatsinni "nutaani" angalasusnut, iluaqutaassaaq. Avannaalu eqqarsaatigalugu USA tamaaneereerpoq, folketingimut ilaasortaq nunanut allanut allakkiamini allappoq, oqallinnerup nalaani folketingimiissinnaannginnami.

- Thulemi raketsinut illersuut pillugu isumaqatigiissummut piumasaqaateqaritsi. Ullumikkut isumaqatigiissut Kalaallit Nunaata pissarsiffiginngilaa, Doris Jakobsen allappoq.

Nunanut allanut ministerip Villy Søvndalip oqallinneq tusaatissatut tiguvaa, Issittumilu ilisimatusarnermut aningaasanik atugassaqartitsinissamik suliaqarnini nanginniarlugu.