- Akueriuminaalluinnarpoq
Tunitsivinnit aqqanilinnit arfineq-pingasut matoreersullu Arctic Green Food qulaajaavigineqalerpoq. Naalakkersuinikkut akisussaasoq Ane Hansen isorinnippoq
- 2012-ip ingerlanerani susoqarsimaneranik tassungalu atatillugu kiffartuussinissamut isumaqatigiissunut akiliutinut atatillugu sunik nassataqartitsisoqassaneranik qulaajaaleruttorpugut.
Taama aalisarnermut, piniarnermut nunalerinermullu naalakkersuisoq Ane Hansen KNR-imi radioaviisimut oqaluttuarpoq.
Suliffeqarfik namminersortoq Arctic Green Food qulaajaavigineqalerpoq suliffeqarfiup tunitsiviisa aqqaniliusut ilaat arfineq-pingasut matoqqammata.
KNR naapertorlugu Arctic Green Foodip tunitsiviisa arfineq-pingasut matoqqanerannut pissutissarpassuaqarpoq. Assersuutigalugu Ikamiuni Upernaviullu eqqaani Aappilattumi tunitsiviit Kalaallit Nunaanni uumasut nakorsaqarnikkut oqartussanit matuneqarsimapput innaallagissamik imermillu pilersuineq naammanngimmata.
- Arctic Green Foodip ukiup ingerlanerani tunitsivinnik taama amerlatigisunik matoqqatitsisimanera soorunami akueriuminaalluinnarpoq. Isumaqarpunga aningaasanik aserfallatsaaliinermut atugassanik immikkoortitsisoqartarnissaa kiffartuussinissamut isumaqatigiissutinik pilersitsinermut atatillugu siornatigut sillimaffigineqartarsimanngitsoq, Ane Hansen KNR-imut oqarpoq.