Sisimiuni marloqiusamik tusarnaartitsineq
Inuit Teatret aamma Ole Kristiansen unnugu pingasunngornermilu Taseralimmi tusarnaartitsilersut
Marlunngorneq 9. oktober kiisalu pingasunngorneq 10. oktober, Inuit Teater aaqqissuisoralugu Ole Kristiansenilu nipilersortoralugu tusarnaartitsissutigineqassaaq ”Qasapip Ullua Kingulleq”.
Tamanna kulturikkut illorsuarmi Taseralik Sisimiuniittumi ingerlanneqassaaq.
- Villads Villasenip taalliaa "Qasapip Ullua Kingulleq" aallaavigalugu igisinnaagassiamik suliaqartoqarpoq Katuami 2001 takutinneqartumi. Tamatumuuna Simon Løvstrøm aamma Ole Kristiansen taallamut nipilersuusiorput nutaaliaasumik Nunatsinni qallunaatsiaat aamma inuit akornanni aaqqiagiinnginnermut tunngasumik, Taseralimmi pisortaq Arnajaraq Støvlbæk oqaluttuarpoq.
Tusarnaartitsinissani erinarsortut nipilersortullu tassaapput: Ole Kristiansen, Randi Broberg, Berthinnguaq Olsen, Julius Larsen, Nuunoq Johansen aamma Gustav Ostermann. Ilitsersuisut Simon ’Mooqqu’ Løvstrøm aamma Maariu Olsen.
Cd; ’Qasapip Ullua Kingulleq’ Ole Kristiansenip 2011 saqqummersippaa.