Eqqarsarluarsimannginneq nukinginnartumik kalerrisaarisoqarneranik nassataqartoq
Nuup eqqaani sapaatip-akunnerani qaangiuttumi Pan Pan-imik marloriarluni kalerrisaarisoqarpoq. Inuilli pineqartut attaveqaatinik atorsinnaasunik peqarsimagaluarpata tamanna psariaqarsimassanngikkaluarpoq
Umiatsiamik angalasartut angalaleraangamik attaveqaatinik atorsinnaasunik nassartarnissaat politiit kingumut kaammattuutigineqarpoq.
Taama pisoqarpoq sapaatip-akunnerani qaangiuttumi Nuup eqqaani umiatsiamik angalasunit ikiorserneqarasuarnissamik kalerrisaarinerit marluk pereersullu.
Marlunngornermi ullup-qeqqata siornatigut nalunaarutigineqarpoq umiatsiaaraq pingasunik inuttalik aavariarnerup kingorna naatsorsuutigineqaraluartutut Qeqertarsuatsiaanut utersimanngitsoq. Tammaaneqartut angalanerminni VHF-radiomik attaaveqaatinilluunniit atorsinnaasunik allanik nassataqarsimanngillat. Taamaattumik Aasiaat Radio aqqutigalugu 'PAN-PAN'-imik kalerrisaarisoqarpoq.
Sivitsunngitsoq pineqartut ajunngitsut Kangerluarsussuarmi nassaarineqarput. Motooriminnik ajornartorsiuteqalersimapput. Pineqartut tamarmik Qeqertarsuatsiaaliaanneqarput, Nuummi politiini pigaartoq Søren Bendtsen ilisimatitsivoq.
Læs også "Sejlerfolk måtte hjælpes efter kaffebrygning"
Attaveqaatit atorsinnaasut eqqaamallugit
Sapaammi ullup-qeqqata missaani PAN-PAN-imik kalerrisaarisoqarsimanera Aasiaat Radio aqqutigalugu ilisimatitsissutigineqarpoq, umiatsiaaraq isikkanik 16-inik takissusilik tallimanik issimasoqarluni Nuup kitaani Kangerup eqqaani qeqertat kujataanni motooriminik ajornartorsiuteqalersimammat.
- Politiit angallataat Sisak II sumiiffimmut nalunaarutigineqartumut aallartinneqarpoq. Taamaalineranili umiatsiaaraq Aasiaat Radio aqqutigalugu nalunaarpoq angallammit allamit kalusiunneqarsimalluni. Umiatsiaaraq issimasullu tallimat tamarmik ajunngitsut Nuuliaanneqarput, Søren Bendtsen oqaluttuarpoq.
- Taamaattumik imaatigut angalasartut inanneqarput VHF-radiomik aamma/imaluunniit attaveqaatinik allanik soorlu qaammataasatigut oqarasuaammik oqarasuaammilluunniit angallattakkamik nassataqartaqqullugit, pisariaqalissappat attaveqatigiittoqarsinnaaqqullugu. Motoorip misissorneqarsimanissaa ajunnginneralu soorunami aamma isumagisariaqarpoq.
- Umiatsiami nassatatit atorlugit qanoq sivisutigisumik asimiissinnaanerit eqqarsaatigisaruk. Umiatsiami aarlerinartorsiunngikkaluarlutit piaartumik ikiorserneqartariaqaleruit nukinginnartumik kalerrisaareriaaseq Pan Pan, atussavat Søren Bendtsen erseqqissaavoq.