Siumup Justus naammagittaalliutigaa

Nalunaaqqutaq 12.00 Inatsisartut siulittaasoqarfiat inatsisartut siulittaasuannik Josef Motzfeldtimik ataatsimeeqateqarluni aallartissaaq, Siumut Inatsisartuni gruppiata Demokraaneersup Justus Hansenip ataatsimiinnermik aqutsineranik naammagittaalliutaannik oqaluuserisaqassallutik.

- Kissaatigaara oqallinnerup perorsarsimanerusumik nipeqarnissaa, taamattoqanngippat pisinnaatitaaffiga naapertorlugu ataatsimiinneq unitsissavara, Justus Hansen Demokraatit, Inatsisartut ataatsimiinnerannik pingasunngornermi sisamanngornermilu aqutsisoq oqallinnerit sakkortuumik ingerlasut pillugit oqartarpoq.

Justus Hansenip eqqissisimanerusumik nipeqarluni oqallinnissamik ujartuinera Siumumi Inatsisartunut ilaasortanit mamaagineqarpoq.

- Siumut ippassaq ataatsimiinnermi aqutsineq eqartutut qeratalluinnartutullu taasariaqarpaa akueriuminaatsumik. Tassami sammisap oqallisiginiarneranut tunngavissaq tamaat isasoortimmagu. Sammisarmi pineqartoq tupinnanngitsumik assigiinngitsunik imaqarmat, Siumumi inatsisartunut ilaasortat naammagittaalliuummik Inatsisartut Siulittaasoqarfiannut allapput.

– Ataatsimiinneq taamaatissavara ilissi…....
Pingasunngornermi ullup-qeqqata siorna inatsisartuni oqaluuserineqarpoq sinerissamut qanittumi aalisartut aalisarsinnaanerannut tunngasumik allaffissornermi allannguutissaq, kisianni periarfissaq taanna atorlugu Siumut aalisarsinnaanermut akuersissutip 1.500 koruuniusup oqallisiginissaanut periarfissipput, Inatsisartuni amerlanerussuteqartut 2009 akuersissutigisaat taamallu ullumikkut amerlanerussuteqartut suli atuutsiinnarumasaat.

- Ataatsimiinneq unitsissavara ilaasortat oqaluuserissasatut immikkoortup qulequtaa malillugu ingerlatsiumanngippata, tassani pineqarpoq akitsuut akuersissutigineqareersup teknikkikkut allanngortinnissaa, illuatungaani allanut sangoqattaartoqarpoq, Justus Hansen pingasunngornermi nalunaqquttap akunnerani marlunni oqallinnermi arlaleriarluni oqarpoq.

Sisamanngornermi ualikkut aammaasiit ajorteqqippoq oqallinneq Kaj Lyberthimit Siumumeersumit aallartinneqarpoq, inuussutissarsiutigalugu umiatsiaararsortut Kalaallit Nunaanni sanaamik umiatsiaararsinermut atatillugu taperneqartarnissaannut tunngasoq oqallisigineqarmat nal. akunnerata ataatsip minutsillu 45 ingerlaneranni oqallinneq sangutinneqarpoq.

Isornartorsiuinerli tunuartinneqarpoq
Kisianni isornartorsiuineq Siumumit akuersaarneqanngilluinnarpoq.

– Justus Hansenip arlaleriarluni oqaatigaa eqqartugaq taasissutigineqartussaq sammineqartariaqartoq, kisianni Inatsisartuni taasissutigineqartussat kisiisa eqqartorumaneqanngillat ullormut oqaluuserisassani immikkoortut ataasiakkaat oqaluuserineqartillugit, pissutigalugu imarisaat tunngavilersuutaallu soorunami aamma oqaluuerineqassammata.

–

- Taasissutigineqartussat taamaallaat oqaluuserissagutsigit apeqqutit aappimik naaggamilluunniit akiinnassagaluarpagut, pissutsilli taamannak ingerlanngillat, Siumut Inatsisartunut ilaasortaat oqarput.

Taamaattumik Siumukkormiut Justus Hansenip ataatsimiinnernik aqutseriaasia naammagittaalliutigineqarpoq.

- Siumup sakkortunerpaamik ataatsimiinnermi aqutsineq naammagittaaliutigissavaa, uanilu pineqarpoq Justus Hansen. Siulittaasoqarfillu inussiarnersumik qinnuigissavarput uan saaffiginnissut pimoorullugu suliareqqullugu, oqallissinnaanissamullu periarfissiinissamut ammaassisumik pissuseqarnissamik nassuiaasioqqullugu.

- Immitsinnut annerusumik piumaffigisariaqarpugut
Inatsisartuni suleriaaseq arlalinnik paragraffeqarpoq Inatsisartuni oqallinnerit ingerlanissaannut tunngasunik.

Assersuutigalugu § 50-imi allassimavoq, ataatsimiinnermik aqutsisup imaluunniit ilaasortap siunnersuutigisinnaagaa isumaqatigiinniarnerit maannakkut unitsinneqarsinnaanerat aamma Inatsisartut oqallinnermik nangitsinngikkaluarlutik aalajangiisinnaatitaanerat. Tassa!

Inatsisartut Siulittaasoqarfiani issiapput siulittaasoq Josef Motzfeldt, IA, siulittaasup tullia siulleq Per Berthelsen, Siumut, siulittaasup tulliata aappaa Olga P. Berthelsen, IA, siulittaasup tulliata pingajuat Finn Karlsen, Siumut, siulittaasup tulliata sisamaat Justus Hansen, Demokraatit.

Sisamanngornermi ataatsimiinneq takeqisoq nalunaaqqutaq 18.55 naammassimmat Josef Motzfeldt oqarpoq:

– Immitsinnut annerusumik piumaffigisariaqarpugut, assersuutigalugu suut oqaluuserineqarnersut tusarnaarlugu.