Maliina kalaallisut saqqummiusserngaartoq
Aatsaat siullerpaamik Maliina Abelsen kalaallisut oqalulluni Inatsisartuni saqqummiussivoq
Aningaasaqarnermut naalakkersuisoq Maliina Abelsen, IA, pingasunngornermi 2013-imut aningaasanut inatsisissatut siunnersuummik saqqummiussigami kalaallit oqaasii atorpai.
Aatsaat perngaammik Maliina Abelsen, nalinginnaasumik qallunaatut oqasilik, Inatsisartut oqaluttarfiannit kalaallisut oqalulluni siunnersuummik saqqummiussivoq, KNR radioavis oqaluttuarpoq.
Oqalugiareernerup kingorna Maliina Abelsenip oqalugiarnini Facebookikkut oqaasertalerpaa
- Kakkaak, pissangallarama! Uanga pisinnaasara qaangerlugu iliuuseqartutut misigisimavunga. Misigissuserpassuarnik akoqarpoq imminut oqarfigiuaannarnikuulluni: "Saperpara", Maliina Abelsen Facebookimi quppernermini allappoq.
- Nalunngilara amerlasuunut nalunanngitsoq! Kisianni tamatta assigiinngitsunik unammilligassaqarpugut, arlaanninngaanniilli aallartittariaqarluta (soorunami aamma uparuaasoqarpoq-aasiit). Taamaakkaluartoq Inatsisartuni peqatikka qutsavigerujussuarpakka tapersersuinersi nalissaqanngilaq.