Kalaallit qallunaallu Issittumi ilisimatusarneq suleqatigiissutigaat
IA’meersoq Sara Olsvig nuannaarpoq qallunaat ilinniartitaanermut ministeriannik Morten Østergaardimut pingaarutilinnik oqariartuuteqarsinnaagami
Pingasunngornermi ullup-qeqqata siorna IA sinnerlugu folketingemut ilaasortaq Sara Olsvig, aamma qaallunaat ilisimatusarnermut ilinniaqqinnernullu ministeriat Morten Østergaard, Radikalineersoq ataatsimeeqatigiipput siunissami ilisimatusarnissanut pilersaarutit suliniutillu Kalaallit Nunaanni ingerlanneqartussat Issittullu sinneranik suleqatigiinneq oqaloqatiissutiginiarlugit.
Sara Olsvig piffissami sivisuumi Danmarkip University of the Arctic-imik tapersersuinissaa anguniarlugu suliniuteqarpoq, taanna issittumi universitetit suleqatigiinnerannik aallaaveqassaaq.
Danmarkip piffissami 2010-2011 University of the Arctic ukiumut 3 millioner koruuninik tapertarpaa. Danmarkimi aningaasanut inatsisissatut siunnersuut naapertorlugu siunissami University of the Arctic taperneqarnissaanik imaqanngilaq. Taamaattumik Sara Olsvig, Danmarkip tapiinissaata pisariaqarnera pingaaruteqarneralu Morten Østergaardilu ataatsimiinnermi oqaluuseraat.
Olsvig: Pingaaruteqaqaaq
- Suleqatigiinneq Issittumi universitetit akimorlugit ingerlanneqartoq University of the Arctic aqqusaartariaqagaa pingaruteqartorujussuuvoq Issittumi sumiiffinni ilisimasanik katersinissamut. Isumaqarpunga pingaaruteqartoq Issittumi ilisimatusarneq ingerlanneqartut aamma Issittumi innuttaasunut iluaqqutaassasoq tamaanilu universitetinut. Tamatuma saniatigut pingaaruteqarpoq issittumi nunat akimorlugit ilisimatusarnermut tunngasut suleqatigiissutiginissaat, tassalu tamannarpiaq University of the Arctic aallaavigaa, Sara Olsvig oqarpoq.
Sara Olsvig aamma Morten Østergaard Kalaallit Nunaanni ilisimatusarneq pillugu allanik aamma oqaloqatigiissuteqassapput, ilaatigut Arctic Research Centre, Aarhus Universitetimi nutaartaasoq aamma inuiaqatigiit ingerlaasiannik ilisimatusarnerit annertusarnissaasa pingaaruteqarnerat.
- Nuannaarutigisorujussuuara ullumi Issittumi - pingaartumik Kalaallit Nunaanni ilisimatusarneq pillugu suleqatigiinnissanut suliniutit arlallit aallartinneqarmata. Taamaattoq maluginiarpara aningaasat ilarpassui aamma pinngortitami ilisimatusarnerit isiginiarneqarnerusut, inuiaqatigiit pillugit ilisimatusarnerit sammineqannginnerusut. Issittumi aamma Kalaallit Nunaanni ineriartornerup nassataanik inuiaqatigiinnut sunniutit arlallit nalilissallugit issiavugut, tassungalu tunngatillugu pingaaruteqartorujussuuvoq inuiaqatigiit pillugit ilisimatusarnerit aningaasalerneqarnissaat pingaaruteqartorujussuuvoq. Tamanna ilisimatusarnermut ministerimut oqariartuutigaara, Sara Olsvig tusagassiivinnut oqarpoq.
Issittumi naalakkersuinermik ingerlatsisut ataatsimiititaliaanni aamma politikerit Akureyrimi Islandimiittumi ataatsimiinneranni sapaatip akunnerit marlussuit matuma siorna, Sara Olsvig inuiaqatigiit ineriartornerannik nalunaaruteqartuuvoq.
Tassani pingaartinneqarpoq issittumi ilisimasat aamma ilisimatusartut atuutsinneqarnissaat taamallu nunaqavissut ilisimasaannik annerusumik atuisinnaaneq eqqartorneqarluni, Sara Olsvig oqaluttuarpoq.