Uuliasioqatigiiffissuaq: Issittumi kuulti qernertoq sussakkeerneqarli
Issittumi qillerinissat iluanaarnartut nunarsuarmi uuliasioqatigiiffiit annerpaartaata ilaannit perngaammik mianersoqqussutigineqarput
Avatangiisini ajunaarnersuaqarnissaanut aarlerinaat annertoqimmat Issittumi uuliasiorluni qillerinissamik pilersaarutit nunarsuarmi nukissiuuteqarnermut suliffeqarfinnit taamaatiinnarneqartariaqarpoq.
Taama nunarsuarmi uuliasioqatigiiffiit annerpaartaasa ilaat Total SA Frankrigimeersoq uissuumminartumik nalunaaruteqartoq Financial Times allappoq.
- Kalaallit Nunaanni uulia ajunaarnersuussaaq. Uuliaarluertoqarpat tamanna suliffeqarfimmut annertuallaamik ajoqusiissaaq, Totalip pisortaanera Christophe de Margerie aviisimut oqarpoq.
Financial Times naapertorlugu uuliasioqatigiiffiup pisortaata mianersoqqusinera issittumi kuultimik qernertumik ujaasinissamut nunarsuarmi uuliasioqatigiiffiit mianersoqqusinerisa siullersaraat.
Ruslandimeersup Gazpromip Issittumi qillerinissamik pilersaarutini isumannaallisaaneq tunngavigalugu qaammammi matumani siusinnerusukkut kinguartippai. Issittoq Ruslandimut nunarsuarmi uuliamik tunisassiortut annerpaartarisaannut siunissami aningaasarsiorfissatut isigineqarpoq.
Læs også "Storbritannien: Stop grønlandsk oliejagt"
Læs også "Jeres mening: Oliejagten skal fortsætte"
Avannaarsuani uuliasiornerup siunissami isumalluarnartuunissaa neriuutigalugu uuliasioqatigiiffiit arlallit ilisimatusarnermut milliardilikkuutaanik aningaasaliipput. Ilaatigut Danmarkimeersoq Maersk Drilling, qillerivimmik nutaamik sikukkut issusuukkut qillerisinnaasumik ineriartortitsinissamut maannakkorpiaq suleqatissarsiortoq. Børsen naapertorlugu suliffeqarfik ukiut tallimat tulliuttut ingerlaneranni qilleriviit nutaat 15-it aqqutigalugit sikunik ajornartorsiutip qaangerniarnissaanik misileraanermini 55 milliarder koruuninik aningaasaliiniarpoq.
Issittumili suliniut piviusunngortinneqarpat Maersk Drilling sakkortuumik isornartorsiorneqaleratarsinnaavoq. Pinngortitamummi nassataasussat avatangiisinik illersuiniaqatigiiffinnit ernummatigineqarput.
Pinngortitamik illersuiniat sassartertut
Totalip pisortaanerata mianersoqqusinera tunngavigalugu pinngortitamik illersuiniaqatigiiffiit sassarterasuarput.
- Mianersoqqussut tamanna uuliasioqatigiiffiit sinnerini maluginiarneqartariaqarpoq. Aarlerinartoqarnera pissutigalugu uuliasioqatigiiffinnit Issittoq mianerilluinnarneqartariaqarpoq, Greenpeacemi Issittoq pillugu paasisitsiniaanermut pisortaq Ben Ayliffe Financial Timesimut oqarpoq.
Totalip oqaaseqaataa uuliasioqatigiiffissuarmit Shellimit Issittumi aamma qilleriniartumit aviisimut oqaaseqarfigiumaneqanngilaq.