Mærsk nangaassuteqarani ingerlatsiinnarpoq

Franskit uuliasioqatigiiffissuata Total-ip nunarsuarmi nukissamik ingerlatseqatigiiffinnut kajumissaarutigigaa Issittumi Kalaallillu Nunaata eqqaani uuliamik ujaasilluni qillerinissamik pilersaarutitik taamaatissagaat, qallunaat uuliasioqatigiiffiat Mærsk Drilling ingerlatsiinnarpoq.

Tassami Mærsk Drillingip attaveqarnermut pisortaa Michael Harboe-Jørgensen Sermitsiaq.AG-mut erseqqissaavoq, Total-ip nalunaaruteqarnera uuliasioqatigiiffimmit nutaamik oqaaseqarfiginiarneqanngitsoq.

Aamma atuaruk "Uuliasioqatigiiffissuitaq: Issittumi kuulti qernertoq unitsissiuk"

Aamma atuaruk "Tuluit Nunaat: Kalaallit Nunaanni uuliamik ujarlerneq unitsissiuk"

Aamma atuaruk "Ilissi isumarsi: Uuliasiorneq ingerlaannassaaq"

Taamaasillunilu Mærsk Drillingip Issittumi anguniagaa ersarippoq:

- Uuliamik pissamaatit, siunissami nassaarineqartussat sisamararterutaasa pingajorarterutaasalu akornanniittoq issittumiippoq. Qularnanngilaq tamanna pilerinartuummat, ujarneqassallunilu, Mærsk Drillingimeersoq Claus V. Hemmingsen Børsenimut oqarpoq.

Uulia ajunaarnersuarmik kinguneqassaaq
Total-ip pisortaanerata issittumi uuliasiornerup unitsinnissaanik kajumissaarunni aviisimi Financiel Times-imi tunngavilerpaa avatangiisinik ernumassuteqarnerminik.

- Kalaallit Nunaanni uulia ajunaarnersuarmik kinguneqassaaq. Aniatitsisoorneq selskabimut ajoquseerujussuassaaq, Totalip pisortaanera Christophe de Margerie aviisimut oqarpoq.

Mærsk Drillingilli aamma isumannaatsuuneq sammivaa, Claus V.Hemmingsen shippingwatch.dk-mut erseqqissaavoq:

- Ulluinnarni ingerlatsineq piumasaqaatit iluanni illersorsinnaasumik isumannaatsumillu ingerlassinnaanngikkutsigu, aammattaarli naammaginartumik ajunaarnersuarmut upalungaarsimalluta, taava taamaasiussanngilagut. Tamanna aalajangiinissatsinnut tunngaviussaaq, piffissami Issittumi ingerlatsilerfitsinni. Issittumi uuliamik kemikalianilluunniit aniatitsisoqassanngilaq, Claus V. Hemmingsen oqarpoq.