Tuttunniat naveersipput
Sapaatip akunnerata naanerani annaassiniarnersuaq akisooq pinngitsoorneqarsinnaagaluarpoq, politiit oqarput tuttunniallu mianersuaalliortut naveerlugit
Nuummi politiit sapaatiummat helikopterimik attartukkamik politiillu qimmiannik atorlutik angummik 40-nik ukiulimmik, arfininngormat unnukkut piniariaqatiminik naapitsisussaagaluamik, ujarlerput.
Angulli naapiffissamut, Nuup Kangerluani kangerluup iigartartup paavanut, takkutinngimmat kammalaataa kalerrisaarivoq.
Ujaasineq, Nuummi Politiit malillugit annertooq akisoorujussuarlu, aallartinneqarpoq ippassarlu taarsinissaa tikillugu ingerlanneqarluni. Ujaasinerli pisariaqarsimanngilaq, angut 21-nik ukiulik naapiffissamut nammineerluni takkummat.
Tamannalu pissutigalugu politiit aavariat naveerpaat.
Tusintilikkaat atulussinnarneqarput
Tassami aavariat VHF-radiomik imaluunniit satellittelefonimik, nunap assinganik pujorsiummik nassartassagaluarput aammalu kisimiillutik pisuttaratik, politiit oqarput.
- Taamaasiortaraanni aningaasanik tusintilippassuarnik sipaaruteqaqataassapput, Niels Nyvang Nuummi Politiineersoq oqarpoq.
Angut 40-nik ukiulik ujaasisitsisoq VHF-radioqaranilu satellittelefoneqarsimanngilaq.