Siunissaq pillugu takorluukkat oqalliseqataaffigikkit
Naleqartitat sorliit ataatsimoorluta ingerlassinnaavavut? Suut sakkugineqassappat taakkua nukittorsarniarlugit? Isummannik saqqummiussigit
Sisamanngornermi qaammatit amerlasuut pissanganartunik pisoqarfiusussat aallartipput.
Naalakkersuisut 2025-mik takorluugakkamik saqqummiussineratigut siunissap qanoq ittuunissaa pillugu eqqarsaasinneqarpugut. Soorlu 2025-mut takorluukkatut neqeroorutip takutikkumasaattut. Taassuma qaavatigut takorluukkamik siunnerfittut anguniagalimmik, siunnerfinnik pilersaarutinik imalik - qanoq iliortoqarnissaannik pilersaarutitalik - pissarsiaraarput. Suliaq kusanartoq piffissami qaninnermi aqunneqarluni tunaartarineqarsinnaasoq.
Siunissaq pillugu takorluukkamik allamik aamma neqeroorfigineqarpugut ”Possible Greenland”. Kalaallit Nunaata siunissaa pillugu suliaq Venedigi Biennaleqartitsinermi takutinneqartoq Kalaallit Nunaanni februaarimi takutinneqassalluni, ukiarlu naallugu aviisimi Sermitsiami sammineqassalluni. Sapaatip akunnerani massumani nunaqarfiit sammineqarput.
Tamatumunnga tunngatillugu Kalaallit Nunaanni Sulisitsisut Peqatigiiiffiat qinngusigassat pingajuannik saqqummiussaqarpoq, tamatumani nungusaataanngitsumik inuiaqatigiinni ilusilersuinissaq pisariaqartinneqartutut tikkuussiffigineqarsimalluni. Takussutissiap tamatuma isiginnittariaaseq allannguallatsilaarlugu saqqummiunneqarpoq, tamatumanilu Future Greenland-i pillugu februarimi isumasioqatigiinnissamut piareersarnermut atatillugu saqqummersinneqarsimalluni. (Possible Greenland Sermitsiaq-mut ilassutinngorlugu saqqummiunneqareernikuuvoq).
Qinngusigassat sisamaat tassaavoq Naalagaaffeqatigiinnerup siunissaa Sermitsiamit Politiken-imillu saqqummiunneqareersimasoq.
Qinngusigassallu tallimaat tassaavoq avinngarusimasuni Issittumi inuuneq pillugu Ilisimatusarfimmi isumasioqatigiissutigineqarsimasoq. Tamatumani siunissamut takorluuinninnerit naleqartutitatullu nunatsinni isigisagut sammineqarsimallutik.
Soorunalimi siunissaq pillugu takorluuinninnerit suli assigiinngitsunit ilusilersorneqarsimassapput, tassami massakkut piffissaasorinartinneqarmat siunissaq pillugu sukumiisumik oqaluuserinnittoqartariaqarneranik. Arlaatigut takorluuinninnitsinni sumi tamaani ataatsimoorussatsinnut tunngasutigut anguniakkatsinnik eqqartuivugut. Aallaavigisavut assigiinngitsut toqqammavigalugit takorluukkatsinnik tunngavilersuivugut, taamaattumillu aamma anguniarlutigu amerlasuut peqatigalugit sumi tamaani oqallittoqarnissaanik, oqaloqatigiittoqartarnissaanillu anguniagaqarluta.
Takorluukkersaarutit ukiariartornerani qaqilersorneqartut, ilumut assigiinngeqigamik?
Naamik. Arlaatigut tamarmik siunertarivaat, piffissat assigiinngitsut takorloorneqarlutik nunatta siunissaanut tunngatillugu kissaatigineqartut pillugit. Assiliarlu ilaatigut ersernerlulaartarpoq silippallaalaartarlunilu, taamaattumillu oqallinnerit aqqutigalugit tikkuussiffiit ersarissarniarsarivagut.
Anguniakkat pingaartitagullu
Anguniagassaq aatsaat piviusunngortinneqarsinnaavoq, amerlanerussuteqartut takorluuinninneq iliuuseqarnermikkut pissusilersornermikkullu tapersiivigippassuk. Tamanna aamma anguniarneqarluarnerusinnaassaaq, pingaartitagut toqqammavigalugit aallaaveqartinneqarsimaguni. Toqqammavigisaq tamatta ilisimalluagarput, nalunnguarnagu qanoq iliuuseqarutta imaaliallaannarlugu piviusunngortinniarneqarsinnaasoq. Arlaatigut ilisimariikkagut toqqammavigalugit naleqartitagullu aallaavigalugit ilusilersorneqarsimasoq. Taamaattumik takorluukkersaarut piviusunngortikkuminarnerusimassaaq pingaartitagut arlallit, imaluunniit toqqammavigisartakkagut atorneqarsimappata (taaguutigineqarsinnaasut arlaqaraluaqaat).
Pingaartitagut suut inerisinniarsarissavagut, taamaasiornitsigullu siunissamut ataatsimoorussassatsinnik suliniuteqarsinnaaniassagatta?
”Nunatsinni naleqartitatsinnik oqallinneq”
Nunatsinni anguniakkatut ataatsimoorussatta amerlasuunit oqallisigineqarnissaat siunertaralugu, matumuuna ”Nunatsinni naleqartitatsinnik” oqalliffik facebook aqqutigalugu pilersinneqarpoq. Tassuunatigut siunertarineqarpoq pingaartitagut assigiinngitsut pillugit oqalliseqatigiinnissarput – oqalliseqatigiinnitsigut ataatsimoorutiligassatsinnik pilersitsiortornissarput – siunissamut toqqammavissarsiornitsinni aallaavigisassatsinnik ikorfassatsinnik nassaassarsiorneq.
Pingaartitassatut isigisagut suut ataatsimoorunniarsinnaavagut? Qanoq iliornikkut suli pitsaanerulersinniarsinnaavagut?
Oqallisigineqarsinnaasut apeqqutissallu ikinngeqaat, pingaartitassagut amerlasoorpassuit assigiinngitsorpassuartigut oqallisigineqarsinnaapput. KISIANNILI akissutissartai suunersut suli ilisimanngilagut – taamaattumillu oqallisigisariaqarlutigit. Taamaattumik ataatsimoorussinissarput pillugu saqqummiussivugut - kissaatigilluinnarparput, tamakku pillugit oqallinnerit torersumik siunnerfeqartumillu ingerlanneqarumaartut. Taamaattumik aamma kissaateqarpugut, kikkut tamarmik peqataanissaminut kajumissaarneqartarumaartut.
Nunatsinni naleqartitagut pillugit tassaavoq arlaatigut ”Iliuuseqaateqarneq” . Tamatumani suliffeqarfiunersoq, peqatigiiffiunersoq, eqimattaanersut imaluunniit naalakkersuinikkut suliniuteqarfiunersoq pineqanngilaq. ”Arlaatigut” iliuuseqaataavoq – facebook-imilu ”ataatsimoorussatut” taaguuserneqarsimavoq – aallartinneqarsimallunilu Sulisitsisut Peqatigiiffiata, Sermitsiaq.AG, Air Greenland-ip, Aningaassaqarnermut Naalakkersuisoqarfiup, KompetenceKompagniet-ip allallu taamatut kissaatigisaqartut suleqatigiinnerisigut, kikkut tamarmik peqataaffigisinnaavaat, tamatumanimi anguniagassaq ataasiinnaavoq tassaasoq: Siunissaq pillugu il.il. oqallittoqarnissaa.
Qanoq isumaqarpit?
Arlaatigut ersarluttoqalersinnaavoq oqallittoqarnissaa arlaatigut pilersaarusiorfigisimanngikkaani. Taamaattumik pingaartitatta arlaat siulliullugu oqallisigineqarnissaa pilersaarusiorneqarsimavoq, tamatumali kingorna oqallinnerit inerisikkiartuaarneqassallutik.
Akisussaassuseqarneq - tassaavoq pingaartikkatsigu oqallisigitinniagarput. Apeqqut tamanna pillugu aviisimi allaaserisat arlaani atuarneqarsinnaavoq.
Oqallinnerup torersumik ingerlanneqarnissaa naatsorsuutigivarput, inussiarnersumik naak apeqqusiiniartoqartaraluartoq. Ingasattajaarinnigani – pingaartitagummi tutsuiginartumik oqallisigisariaqarpagut, aammalu akunnitsinni torersumik pissuseqarnissarput eqqaamasariaqarlutigu
Sapaatip akunnerani Sermitsiami saqqummersumi sammisaq annermik oqaluuserineqarpoq, aviisi qarasaasiannut ivertitassaq uani pisiassaavoq: