Taamaattumik ulluni marlunni benziina ajornarsimavoq
Tasiilami innuttaasut arfininngornermi ualikkumiit ataasinngornermi ullaap-tungaanut benziinamik orsersorsinnaasimanngillat
Tasiilami innuttaasut benziinamik pissarsisinnaannginnerannik tusatsiakkat Facebookimi ingerlatinneqaqattaarput.
Kisianni taamaattoqanngilaq.
Taama KNI A/S - Polaroilimi pisortaq Peter Grønvold Samuelsen oqarpoq.
- Sapaatip-akunnerata naannerani pisoq tassaavoq arfininngornermi ualikkut nal. 17-imiit Tasiilami benziinamik tunniussisoqarsinnaajunnaarnera. Tamanna ataasinngornermi nal. qulit missaanniit ajornarunnaaqqippoqg.
- Tamanna benziinamik tankip naqqaniittumik tankimut allamut nuussisoqartussaasimaneranik pissuteqarpoq, pilersuisoqaqqilersinnaaqqullugu, Peter Grønvold Samuelsen Sermitsiaq.AG-mut oqarpoq.
KNI A/S – Polaroilip ullumi Tasiilami ullunut 20-t missaanniittunut benziinaateqarnera oqaluttuaraa. Tasiilamullu uuliamik assartuummik pajuttumik aqagu tikittoqartussaasoq.
- Sapaatip-akunnerata naanerani pisup pisisartutsinnut akornutaasimanera ajuusaarutigaarput, imaanngilarli illoqarfik benziinamik nunguutsisimasoq, Peter Grønvold Samuelsen erseqqissaavoq.