Pingasunik ukiullip iliveqarfimmi eqqumiigisat suliarisimagunarpai

Kujataani provsti naapertorlugu Qaqortumi iliveqarfimmi naneruuserfiit uppikaasimanerannik eqqumiilliorneq sumit aallaaveqarnersoq paasineqarpoq

Qaqortumi iliveqarfik iluarsaasereernerup kingorna. Assi: Inga Dóra Gudmundsdóttir Markussen

Kujataani provsti Dorthe Petersen aliasuttoq nuanniilliortorlu Sermitsiaq.AG-p marlunngornermi oqaloqatigaa, taamani oqarpoq inuk ataaseq arlallilluunniit Qaqortumi iliveqarfimmi naneruuserfinnik nunamit nutsueriarlutik sumut tamaanga eqqaasimasut.

Nassuiaat politiit ilumuunnginneragaat taakkumi oqarput aserorterinertut taasaagaluaq anorimit pissuteqartoq.

Maannali pisoq allatut nassuiaatissaqalerpoq.

- Ippassaq anaanaasumit sianerfigineqarpugut oqaluttuartumik, panini pingasunik ukiulik ikinngutini ukioqatigisani alla ilagalugu iliveqarfimmiissimasoq. Taassumallu naneruuserfiit nunami ikkusimasut nutsussimagai, Kujataani provsti Dorthe Petersen Sermitsiaq.AG-mut oqaluttuarpoq.

- Meeqqat pingasunik ukiuliinnaat iliveqarfimmiissimasut? Inersimasunik ilaqaratik?

- Iliveqarfiup eqqaani inuit najugaqarfeqarput ajornanngitsunnguamik iliveqarfik iserfigineqarsinnaavoq. Anaanaasoq oqaloqatigisara oqarpoq meeqqat taakkua marluk kisimiillutik iliveqarfimmiissimasut.

- Nuaannarutigiinnarpara meeqqap mikisup piliarisimammagit inersimasullu aserorterinermik ingerlatsisimanngimmata, Dorthe Petersen erseqqissaavoq.

Powered by Labrador CMS