Umiarsuaq nakkutilliissut Triton arfininngornermi unnukkut Reykjavikimit aallarpoq imaatigut annaassiniarnermik sungiusarneq SAREX 2012 Kalaallit Nunaata Tunuata Avannaani sapaatip akunnerata ingerlanerani pisussaq peqataaffigiartorlugu angalasut arfininngornermi unnuakkut sapaallu tamaat anorersuarsiorput. 

Anorersuaq malinnik 10 meterisut portutigisunik pilersitsivoq angallammi ilaasuinnaat amerlanerpaat sapaat tamaat makinngitsoorlutik. Umiarsuarmi inuttat aalajangersimasut 52-it saniatigut umiarsuaq 46-nik allanik ilaasoqarpoq. Taakkunannga nunatsinni politiinngorniat atuarfiannit ilinniartut aqqaneq-marluk.

Ilaasut sapaatip akunnerata ingerlanerani imaatigut annaassiniarnermik sungiusarnissami aatsaat taamak angitigisumi inuttaasuusaassapput, taakkualu sungiusarnerup nalaani qanoq pisoqarpiarnissaa ilisimanngilaat, taamaallaat Tritonimut ilaasut umiarsuarmik ilaasortaammik "Arctic Victory-mi" ilaasuusaartussaapput annanniarneqartussaallutik. 

Inuttaasuusaartussat piaaralugit paasitinneqanngillat sungiusarnissaq pissusissamisoortinniarlugu.

Sapaammi unnukkut Triton Ittoqqortoormiut sineriaannut annguppoq pilersaarutillu naapertorlugit ataasinngornermi ualikkut Ella Ø tikinneqarsimalissaaq.