Skip to main content

Koreap præsidentiata Kalaallit Nunaat kajumigineqarluartoq tikippaa

Kalaallit Nunaannit ujaqqat aatsitassanik qaqutigoortunik akullit pissarsiariumaneqarneri nunarsuarmi qeqertat annersaannik soqutiginnilersitsivoq 

Sapaammi Koreap Kujalliup præsidentia, Lee Myung-bak, Kalaallit Nunaannut tikissaaq. Nunarsuarmi nunat aningaasaqarnerpaat 20 ilaannit tikeraarteqarnerup ersersiinnarpaa Kalaallit Nunaata nunat tamalaat akornanni soqutigineqarnerujussua. 

Pingaartumik nunatsinni ujaqqat aatsitassanik qaqutigoortunik elektronikkimi, anorisaatiliani, biilinilu innaallagiatortuni atorneqartartunik peqarluarnera, nunarsuarmi nunat aningaasaqarluartut Nuummut soqutiginninnerannut tunngaviuvoq. 

- Soorunami Koreap Kujallermi qaffasissumit inissisimasup tikeraarnerata ersiutigaa soqutiginninneq. Taava aperisoqarsinnaavoq suut soqutigineraat, Danmarkip Issittumi aallartitaa Klavs A. Holm Ritzauimut oqarpoq nangillunilu: 

- Tassunga tunngatillugu oqartoqartariaqarpoq suliffeqarfissuit suut Koreami piunersut, taamaattumik aatsitassat qaqutigoortut soqutigisimassavaat. 

Ullumikkut Kina aatsitassanik qaqutigoortunik 17-inik kisermaassingajavilluni piiaasuuvoq, nunami tassani aatsitassat qaqutigoortut nunarsuarmi piiarneqartartut 95 procentiannik piiaasoqarpoq. Tamanna pissutaalluni akit qaffarujussuarsimapput. 

Taamaakkaluartoq Kinamit nunatsinni periarfissat aamma soqutigineqarput. Tamanna ersersinneqarpoq aasaq manna Kinap præsidentiata Danmarkimut tikeraarnerani. 

Juulimi Kalaallit Nunaata aamma EU'p isumaqatigiissutigaat, aatsitassat qaqutigoortut kinamiunut tunniunneqannginnissaat illuatungaani nunarsuarmi tuniniaavinnut ammasunut neqeroorutigineqartarnissaat.  

Kalaallit Nunaanni aatsitassanik piiaasoqarluni iluanaartoqalissagaluarpat Danmarkip iluanaarutissaaraa nunatsinnut ukiumoortumik tapiliuttagaata millisarneqarnissaa. Kalaallit Nunaanni namminersorlutik oqartussanik iluanaarutissat pillugit isumaqatigiissut erseqqippoq.

Kalaallit Nunaata ukiumut 75 millioner koruunit aatsaat qulakkeeqqaassavai. Sinneruttut nunat marluk akornanni agguarneqassapput, aningaasat Danmarkip pissarsiassai atorlugit tapiissutigineqartartut ukiumut 3,5 milliarder koruuniusut millisikkiartorneqassallutik. 

Aatsaat ukiumut tapiliutaasartut nul-imut pisinneqarpata isumaqatigiinniarnerit aallarteqqissapput. 

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER