Avannaani umiatsiaararsortut qaleralittassaat amerlineqarput

Sinerissap qanittuani angallatinut 6 meteri ataallugu takissusilinnut qaleralittassiissutit aalisartitsivinni Qeqertarsuup Tunua, Uummannaq aamma Upernavik tamarmik immikkut 300 tonsinik 2012-ip sinneranut ilaneqarput – tassa katillugit qaleralinnik 900 tonsinik qaffaasoqarpoq. Taamak aalisarnermut naalakkersuisoq Ane Hansen ullualuit matuma siorna nalunaarpoq.

Taamaattumik umiatsiaararsortut sapaatip akunnerani uani tunisisinnaanerat Uummannami, Qeqertarsuup Tunuani Upernavimmilu unitsinneqartut oktobarip aallaqqaataani aalisarnertik aallarteqqissinnaavaat.

Ilassutit agguarneqassapput aqutsivinni pingasuni oktoberimi, novemberimi decemberimi qaammammat 100 tons tikillugit tunineqarsinnaassallutik.

Qaleralittasseeqqinnermut piumasaqaataavoq aalisartut pisarnertut Pinngortitaleriffimmik suleqateqarnertik ingerlatiinnassagaat, taamaaliornikkut ataavartumik ilaatigut qalerallit angissusaasa allanngoriartornerat malinnaaffigineqarniassammat. Aalisartut KNAPK-lu aamma piareersimaqquneqarput qaleralittassat apparneqarsinnaanerannut, taamatut biologit innersuussuteqassappata.

Umiatsiaararsorluni pisassat aalisartitsivinni pingasuusuni augustip naaleranerani imaalerput:
Qeqertarsuup tunua: 3.379 tons.
Uummannaq: 3.730 tons.
Upernavik: 3.154 tons.
Katillugit 10.263 tons

PISASSIISSUTAAREERSIMASUT:
Aqutsiveqarfimmi Qeqertarsuup Tunuani pisassiissutaareersimasut sinneruttut ataasinngornermit septemberip 3-anit tunineqalersinnaapput. Aallaqqaammut juulip 28-anni unitsinneqaqqaaraluarput.

Aqutsiveqarfinni Uummannami Upernavimmilu pisassiissutaareersimasut sinneri aalisarneqaannassapput.

Taamattaaq Ane Hansen ilisimatitsivoq aalisarnikkut soqutigisaqaqatigiit suleqatigiissitaliamut aalisarnerup iluarsaannerani sulisussamut peqataasut. Suleqatigiissitaliap 2013 eqqarsaatigalugu aammalu siunissaq ungasinnerusoq 2014 aallarnerfigalugu aalisarnerup iluarsaannissaanut siunnersuutit suliarissavai.