Isummersuut: Internetimi killilersugaanani oqaaseqarsinnaaneq

”Internetimi killilersugaanani oqaaseqarsinnaanermik” qulequtserlugu AG-mi isummersortartoq Jørgen Chemnitz sapaatit akunnerani isummersuummini uani saqqummiussinnaasatsinni ima alappoq:

"IIsummersornerujussuup nalaaniippugut imaanngilarli isummat tamarmik paasinartut.

Internetimi nutaarsiassaqartitsiviit siuttuusut tassaapput Sermitsiaq.AG aamma KNR.gl. Nittartakkani taakkunani nutaarsiassat kikkuugaluartunilluunniit oqaaseqarfigineqarluartarput.

Taassuma saniatigut periarfissat tamarmik ammapput Facebookimi oqaaseqarnissatsinnut assitalerlugit. Siuariarneruvoq annertooq.

Tamanna tusagassiiviit atorneqarsinnaanerannik ammaassivoq. Tamakkiisumik isigalugu inuit amerlanerujartortut tamanut ammasumik isummersorsinnaanerat ajunngilluinnarpoq. Tassani isummersortartut kisimik periarfissaqanngillat.

Periarfissat nutaat atoruminarput, ajunngeqaarlu, minnerpaaffeqartariaqarpulli akisussaassuseqartoqarlunilu.

Nutaarsiassaqartitsiviit

Nutaarsiassaqartitsinikkut nittartakkat imartuut KNR aamma Sermitsiaq.AG nunatsinni nutaarsiassanik tamanut apuussigasuartarput, inuillu taakku tamarmik isummersornissaminnut oqaaseqarnissaminnullu periarfissaqarlutik. Nutaarsiassaqartitsivinnili saqqummersitsinermut najoqqutassat sumiginnarneqarput.

KNR-imi inuit kikkulluunniit qanorluunniit imminnut taaguuserlutik oqaaseqarsinnaapput. Kinaanerlutik oqaatigisussaanngilaat, tamannalu nutaarsiassaqartitsinermi ileqquusunik avaqqutaarineruvoq.

Atimik taasinani oqaaseqarneq qanga internetip atuleqqaarneranit aallaaveqarpoq, taamanikkut sukkaqisumik inuppassuarnut apuussisinnaaneq unnersiutigineqarluni inuillu tamarmik oqaaseqarnissaminnut periarfissaqalerlutik. Interneti aallaqqaammulli inunnut nutaarsiassaqartitsivitoqqani atuartartunut allannissaminnut eqiasuttunut tunissutaavoq. Killilersugaanani oqaaseqarsinnaaneq annertuseriarujussuarpoq.

Internetilli nutaaliatut saqqummernera qangarsuarli qaangiuppoq. Eqqaamavara Sermitsiaq.gl aallarteqqaarmat. Taamani oqallisigineqarpoq oqaaseqarniaraanni atiminik taasinani oqaaseqarsinnaanissaq sumut killeqassanersoq. Aallaqqaammut atimik taasinani oqaaseqartoqarsinnaavoq, taamaakkunnaarporli. Sermitsiaq.AG-mi nutaarsiassat oqaaseqarfiginissaannut periutsimik nassaarsimavoq. Tassani atimik taasilluni oqaaseqartoqarsinnaavoq, oqaaseqartup oqaatsini nammineq akisussaaffigalugit. Tamannali KNR-imi atorneqanngilaq.

Ukiualuit matuma siornagut KNR-imi qullersat ilaannik oqaloqateqarnera eqqaamavara, taannalu isumaqarpoq internetimi siunertarineqanngitsoq atimik taasilluni allattarnissaq. KNR suli taama isumaqarsimagunarpoq. Saqqummersitsinermut najoqqutassat naapertorlugit ingerlatsinnginneq pitsaanngilaq. Qanorsuaq isumaqarsinnaavutit sunaluunniillu allallugu, kinaanersutilli kikkut tamarmik ilisimallugu. Allassimasatit akisussaaffigissavatit.

Maalaartarfik Facebook

Inuit attaveqaataasa pingaarnersaat Facebook aamma nunatsinnut anngussimavoq, ajunngeqaarlu. Nunatsinni inuit qassit Facebookimik atuisunersut kisitsisitigut takussutissaqanngilaq, eqqorniarneqarporlu 5.000 aamma 10.000 missaanniittut. Sulilu amerlanerusinnaapput. Nuannaarlutit ilanngutiinnaqiit. Attaveqaataavoq pitsassuaq internetimillu atuileqqaanut atugassaqqilluni tassanilu takuneqarsinnaalluni internet sumut atorneqarsinnaanersoq. Qaa suli aamma.

Killilersugaananili ajornanngitsumik oqaaseqarsinnaaneq aamma ajoqutitaqarpoq. Atuisorpassuit oqaaseqarnissaminnut periarfissaqarput, sukujuit isumaqanngitsut saqqummiunnissaannut. Isummat anikkuminartuummata imaanngilaq qarasaq qasuersartikkallarneqassasoq inimilu qarasaasiap saanut ingilluni.

Aaqqissuineq

Tusagassiutitoqqanut naleqqiullugu inuit attaveqaataat allaapput. Angut utoqqaq isumaluttoq qanoq allattoqarnissaanik oqaluttuartoqarnissaanillu aalajangersuilluni aaqqissuisuunngilaq. Inuuninni nammineerlutit aaqqissuisunngoravit ajunngeqaaq, kajumissaarutigissavarali pitsaasumik aaqqissuisinnaanerit atorluassagit. Eqqarsaatigeqqaalaaruk oqaluttuariniakkat allanut soqutinarnersoq pingaaruteqarnersorluunniit.

Imminut qivialaartarit. Suut tamarmik tamanut soqutiginartuunngillat".

Jørgen Chemnitz AG'mi isummersuuteqartartut ilagaat sapaatit akunneri tamaasa atuartartunut qaammaassaqarnartunik allattartut.

Qisuariaat: KNR-p pisortaa isumaqataalluinnarpoq

Hej Jørgen Chemnitz
Isumaqatigilluinnarpakkit. Nittartakkatsinni atimik taasinani oqaaseqarsinnaaneq periarfissaqartariaqanngilaq. Aalajangerneqarporlu periarfissaq taanna peerneqassasoq. Ulluni makkunani nittartakkatsinnik sulisut nittartakkamik annertuumik allanngortiterileruttorput, qaammatillu ataatsip ingerlanerani naatsorsuutigaarput atimik taasinani allassinnaaneq periarfissaqarunnaassasoq.
Inuulluaqqusillunga,
Ivalo Egede, KNR