Kiisami Nuup qimmii ikiorserneqarsinnaalerput
Sivisujaamik uumasut nakorsaqarsimanngeriarluni qimminillu nakkutilliisoqarani Kommuneqarfik Sermersuumi qimminik nakkutilliisumik atorfinitsitsisoqarpoq
Nuummi qimminut tamanut, qimmiutilinnut allanullu sisamanik nioqarlutik meqqulinnik nuannarisalinnut nuannersumik nutaarsiassaqarpoq.
Kommuneqarfik Sermersooq uumasullu ikinngutaat Dyrenes Venner suleqatigiilersimapput illoqarfimmi uumasunut nakorsaqannginnera peqqutigalugu.
Tamassuma kinguneraa Kommuneqarfik Sermersuup qimminik nakkutilliisumik atorfinitsitsinerat, uumasut ikinngutai suleqatigalugit illoqarfimmi qinmminik qitsunnillu aaqqissuussisoqarluni.
Isumaqatigiissummiippoq qimmit qitsuillu angalaaginnartut tigunissaat uumasullu ikinngutaannut ingerlallugit. Qimmit tamarmik kapitissimanersut misissorneqartassaaq, qimmillu takussutissaqanngitsut piginnittup akiligassaanik kapiteqquneqartassapput imaluunniit toqunneqarlutik.
Akiuussutissamik kapitinneq
Siunissami qimmeq qitsulluunniit kapineqarsinnaalissaaq. Kommuneqarfik Sermersooq uumasunut nakorsiartarfiusimasumi ininik attartorpoq, qaammammullu marloriarluni perlerornermut, qimmit nappaataannut, tingulluummut parvovirusimullu kapitittoqarsinnaalissaaq.
Danmarkimut aallaleraanni uumasut ikinngutaannut piffissamik inniminniisoqarsinnaajuassaaq, tassami uumasut nakorsaata uppernarsaataanik pissarsisoqartussaavoq.
Siunissami qimmit akuerisamik nalunaaqutserneqartassapput tamannalu Kommuneqarfik Sermersuup aamma isumagisinnaavaa, kommunimit nalunaartoqarpoq.
Nuummi uumasut nakorsaa namminersortoq maajip 10-ani taamaatippoq.