Pædagogikkimi kanditatit nutaat 14
Cand. Pæd.-it almen pædagogikkimi ilinniagaqartut 14-it Ilinniarnermut Ilisimatusarfimmi, Ilisimatusarfiup ataaniittumi ilinniagaqarnertik naammassivaat
Arfininngornermi Ilimmarfimmi ullorsiortoqarpoq kandidatit nutaat 14-it naammassinersiortinneqarmata taakkua ilinniarnerminnik naammassinnillutik maanna Cand. Pæd.-imik immunnut maanna taagorsinnaalermata.
Holdit taakku tassaapput siullerpaajullutik, Ilinniarnermi Ilisimatusarnermut nalunaarusiaq 2005-imeersoq tunuliaqutaralugu kandidatitut iliniagaqarnermik aallaqqaataaniit ingerlatsisimasut. Ilinniagaqarneq meeqqat atuarfianni peqqussut nutaaq 2002-miit atuutitinneqalersumut atatillugu aallartitinneqarpoq. Taamaalillutik kandidatingorlaat, meeqqat atuarfiata ineriartortinneqarneranut aamma meeqqat atuarfiannut sakkussanik, meeqqat atuartinneqarnerat pillugu aamma kulturi pillugu ilisimasatigut ilisimatusarnissamut piginnaaneqalersinneqarput.
Taamak Ilisimatusarfimmit tusagassiivinnut allattoqarpoq.
Kandidatitut ilinniagaqarnermi siunertarineqartoq tassaavoq, ilinniagaqartut perorsaanikkut, inooqatigiinnikkut aamma humanistiskiusumik ilisimatusarnikkut ilinniagaqarnermi inuiaqatigiinnilu pisutsit imminnut ataqatigiinnerisa misissoqqissaarneqarnissaannut , soorlu aamma ilinniagaqarnermi aaqqissuussinerit naapertuuttut pitsaanerpaallu ineriartortissagaanni inuaqatigiinnik, oqaasiinik aamma kulturiannik ilisimaarinninnissap pingaaruteqartuunerata tunngavilersornissaannut ilinniagaqartitsineq.
Taamaattumik ilinniagaqartut namminneq ilinniagaqarnermik nalaani ilinniartinneqarnertik, Kalaallit Nunaanni ilinniagaqarnikkut aaqqissuussinerit, inuiaqatigiit, aammalu inuiaqatigiit immikkut ittuunerisa aamma kulturip ilinniagaqarnerullu akornanni pissutsit aamma aaqqissuussineq paasinarsarsinnaasimavaat.
Ilinniagaqartut siunissami sulinissaminni Kalaallit Nunaat moderniusoq tunngavigalugu sulisinnaaqqullugit tamanna ingerlanneqarpoq, soorlu aamma ullutsinni inuiaqatigiinni ineriartorsimasuni allani taama pisartoq.
Ilinniagaqarnerup kandidatinngorlaat Kalaallit Nunaanni atorfinnut assigiinngitsunut piginnaaneqalersippai, kisiannili atorfinnut immikkuullarissunut, ilisimatusarnerup aamma atuartitsinerup ingerlanneqarfiinut immikkut piginnaaneqartilerlugit.
Ilinniagaqartut ilinniarnermik nalaani professor Anton Höem’imit Norgimeersumit, ukiuni 50-ini ilinniagaqarneq pillugu ilisimatusarnerup iluani misilittagaqartumit, Professor Geoffrey E. Mills’imit USA-meersumit, ilaatigut ilinniagaqarneq pillugu ilisimatusarnermi periutsit pillugit atuakkiorsimasumit aamma Frank Darnell’imit USA-meersumit, issittumi nunani atuarfeqarfinnik aaqqissuusseqqinneq pillugu ukiut 40-t sinnerlugit sulisimasumit atuartinneqarsimapput.
Ilinniagaqarnerup ingerlanera kommunit aningaasaleeqataasimasut qanittumik suleqatigigalugit ingerlanneqarsimavoq, soorlu aamma meeqqat atuarfianni ilisimasat aamma periutsit ingerlanerani qanittumik suleqatigiiffiginerat pingaartillugu ingerlanneqarsimasoq. Taamaattumik meeqqat atuarfiata kandidatinngorlaat pisuunnguallaatigai.