Nersutinik toqoraasartutut naammassisut qulingiluat

Neqi A/S ilinniartut qulingiluat nersutinik toqoraasutut naammassillutik allagartartaartut nuannaaqaat

Nersutinik toqoraasartutut ilinniakkaminnik naammassinnittut: (aqqi assimitulli tulleriiaagaanngillat) Barselaj Erngsen. Otto Davidsen. Sofus Hansen. Anthon Korneliussen. Ove-Lars Møller. Jens Frederik Mathiassen. Preben Lund. Bartholomæus Møller. Lasse Jonassen. Assi: John Rasmussen, Narsaq Foto

Kommune Kujallermi Inuussutissarsiornermik suliffissaqartitsinermullu ataatsimiititap siulittaasuata, Kalistat Lundip, tallimanngornermi nersutinik toqoraasartutut ilinniakkaminnik naammassinnittut qulingiluat sooraarummeerlutik angasaannik suliffittaarnerannillu pilluaqquai.

Tamarmik toqoraavimmi Neqimi atorfinipput.

- Kommunip ilissi maligassiuisutut assorsuaq naatsorsuuteqarfigaassi. Ilissi tassaavusi inersimasunik ilinniartoqarluni perngaamik ilinniagaqartitat, ilissilu Kujataani nerisassiornermik pitsanngorsaallusilu siuarsaaqataassaasi, siunissami Kalaallit Nunaanni inuussutissanik pilersuisussatut naatsorsuuteqarfigisami. Aappaagu toqoraavik nutaaq naammassippat nersutinik toqoraasutut ilinnialersussanik nutaanik ilitsersueqataassaasi, Kalistat Lund oqarpoq.

Neqi annertuumik suleqataasimanera qulajassuteqarfigaa ilinniartunik taamak amerlatigisunik ingerlatseqataarusussimammat.

Tunisassiorfiup pisortaata Henning Sønderupip soraarummeernermut allagartat agguaatereermagit nersutinik toqoraasunngortut oqaaseqartitaat Sofus Hansen oqaaseqarpoq, taassuma kommuni, Neqi aamma Inuili qujassuteqarfigai, aammali erseqqissaatigalugu ukiuni qaangiuttuni marlunni assigiinngitsunik ajornartorsiuteqartoqarsimasoq, neriuutigaluguli taakkua ilinniartut nutaat aallartinnginneranni aaqqiissuteqarfigineqarumaartut.

Powered by Labrador CMS