Skip to main content

Sanaartugaq ataqqinaataasoq assortuussutaasoq

Illussanik titartaasartup napasuliap allaffeqarfiup Nuuk Centerillu ilusilersorneqarnera assortuussutaasoq illersorpaa 

Takujuminaatsoq imaluunniit illussanik titartaasartup torrallattataa siunissami nuannaarutigineqartussaq? 

Illorsuaq 25.000 kvadratmeterinik angissusilik, namminersorlutik oqartussani naalakkersuisoqarfiit Nuuk Centerillu nutaap inissisimaffissaat isiginnittumit isummerfigisassaavoq. 

 Ilaasa Narsarsuarmi illup allaanerusumik ilusilersorsimanera nuannaraat. Allat silataata kanngussammik qasertumik qalligaq sorlummigaassutigaat. Sananeqaannalersorlu aterusersorneqalerpoq. 

– Pinerluuteqarsimasunut inissiisarfik nutaaq, ilaatigut sanasut qalipaasullu taamatut taavaat, igalaarpassuit ungalulersorneqarsimanerat pissutigalugu. 

Naammassillugulu sananeqareersoq ilaasa nutaamik aterusitaartippaat. 

– Assaligut (imaluunniit kiligaat). 

KHR Arkitekter-imi piginneqataasoq aammalu Det Kongelige Danske Kunstakademis Skoler-imi professori, Jan Søndergaard, illorsuarmik titartaaqataasimasoq, ugguarpoq. 

– Aterutsit tamakkua ajornerpaat ilagaat, taanna oqarpoq. 

 

Anersaartorpoq 

Jan Søndergaardip nammineq illu sananeqareersoq takusimanngilaa Nuummiikkusussimagaluarlunilu ilusilersornerata siunertaa nassuiariartorlugu, taamasilluni erseqqissaalluni paatsuuinerillu peersinniarlugit. 

Isumaqarpunga kanngussaap trapezpladininngarnit taamatut atorneqarnera allaanerusumik alianaallunilu kusanartuusoq. Trapezpladit Kalaallit Nunaanni Savalimmiunilu illutoqqanut qisunnut qalliutitut atorneqartartorujussuunnguatsiarput. Oqimaappaseqaat, Jan Søndergaard isumaqarpoq. 

– Siullermiinngilluinnarpoq illussanik titartaasartut sanaavi inunnit nuannarineqannginnerat, kingusinnerusukkulli isumassartaa takusinnaasarpaat, Jan Søndergaard oqarpoq. 

KHR Arkiteketer-ip sanaartukkaminut nutaamut nittartagaa iserfigigaanni tassani nassuiaatissaqarpoq. 

»Illuap qaavi tamarmik eqqarsaatigineqarpoq manissuussasut qalipaateqarlutillu nunami avatangiisimi qilaap qaamarnganik nikerartumik takussutissalimmik. Illu misigineqassaaq qilaap qaamarngata akisunneranut ataqatigiissillugu nunap »anersaartornerata« ilassutitut takussutissartaatut«, KHR Arkitekter allappoq. 

 

Apusinernut takussutissatut 

Sanaartortitsisoq MT Højgaard nittartakkamini nassuiaavoq illup sivinganeranut saqqaatalu qillarlunnera takussutissaasut sermimut, apusinernut Nuullu Kangerluata imaata qaavinut.

Tamatuma kingorna illu sananeqarsimavoq betonimik kanngussammillu, saavi aluminiumik panelinik igalaaminermillu kiisalu tassa maluginiarneqartumik kanngussammik assiaqutinik. 

– Tamatumani isumaqarpunga eqqortumik toqqaasimalluta. Angissutsit kipitinniarsimavagut suut akimut ersitsinnerisigut. Taamaasilluni illu misigitinniarparput mikinerusutut, eqqarsaataasimavorlu qaamanerup pinnguarfigissagaa saqqaa uumassuseqalersillugu. Neriuutigeqaara inuit isumaqassasut tamanna iluatsissimasoq. 

Ilaat isumaqarpug kanngussammik assiaqutit ilaat kukkusumik ikkunneqarsimasut. Taamaattoqarsimasinnaava? 

– Kukkusumik silaannalersorneqarsimasinnaapput. Strækmetali atorneqartoq peqqumaasivimmeersimappat imaluunniit fabrikkimeersimappat takorloorneqarsinnaavoq assigiinngisitaaruteqartoq, assigiilluinnartutut isikkoqarunnaarsillugu. Piffissap ingerlanerani peeriartussaaq, Jan Søndergaard oqarpoq. 

Sermitsiami atuarsinnaavat sooq illussanik titartaasartut isumaqarnersut napasuliamut allaffeqarfimmut atatillugu namminersorlutik oqartussat kukkorujussuarsimasut, sooq namminersorlutik oqartussat Nuuk Centeritut saqqaani kanngussammik assiaqutit allaffiit igalaavini atorumasimanngikkaat, tusaasinnaallugulu ukiukkut sermip aputillu saqqaanut torartarnerat. 

Sermitsiaq nummer 33 uani pisiarisinnaavat:

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER