Piujuaannartitsinissaq tassa suleqqaarluni nuannisarneq

Qeqqata Kommunia aningaasaqarnermut naalakkersuisumit Maliina Abelsenimit arfininngornermi nersualaarneqarpoq, Sisimiuni taseralimmi piujuaannartitsinissaq anguniarlugu isumassarsioqatigiittoqarluni ataatsimeersuartitsinermik aaqqissuussineq Taseralimmi ingerlanneqartumut tunngatillugu.

- Siullermik Qeqqata Kommunia Velux-illu Aningaasaateqarfii qutsavigissavakka piujuartitsinissaq pingaartillugu maani eqqartuinissaq periarfissimmassuk, aasaq manna nu­narsuarmut tamarmut tunngasumik eqqartuiffiusimasumi. Ineriartorneq piujuartitsinermik tunngavilik isumaqarpoq inuiaqatigiinni ineriartornermut, kinguaariinnut tullernut atugarissaarnermut, aalisarsinnaanermut naligiinnerulernermullu akissaqarneq.

Oqalugiaatimini ilaatigut eqqartorpaa inuiaqatigiit imminnut napatittu taamaallaat pinngortitamut avatangiisinullu tunngassuteqanngitsut.

- Piujuaannartitsineq pinngortitamut avatangiisinullu tunngaannanngitsoq. Inuiaqatigiinni pissutsinut tamanut tunngassuteqarpoq aninggasaqarnermut, inooqatigiinnermut kulturimullu sammillunittaaq. Takakkulu aamma uagutsinnut atuupput. Allatut oqaatigalugu piujuaannartitsineq taassavoq uagut tungitsinniit inuiaqatigiit innuttaasullu maanangaaq ineriartornissaannut periarfissanik pilersitsineq, ilutigalugu kinguaariiaat tulliuttut periarfissaannik assingusunik qulakkeerinerit. Taamaattumik piujuanaartitsineq sunut tamanut attuumassuteqarpoq najugarisamiit nunarsuaq tamarmiusoq ilanngullugu, Maliina Abelsen Riomi ataatsimeersuarnermi peqataaffigisaminit sunnertissimaqisoq taamak oqarpoq.

-Tamakku Rio-miit Sisimiunut nassassavagut, nukissiuutillu piujuaannartitsinermik tunngavillit ineriartortinneri ingerlateqqillugit pisuussutittalu piiarneqarneranni piumasaqaatinik saqqummiussaqarluta. Ineriartornermi tassani inuiaqatigiit akornatsinni sanngiinnerpaat kivinneqassapput, tamannali kinguaariiaat tulliuttut pinngortitamik atornerluinerannik akeqassanngilaq.

Isumaqatigiissutigineqarportaaq piujuaannartitsineq tunngavigalugu ineriartortitsinissamut aningaasanik pissarsiniartoqassasoq. Aningaasanimmi nassartoqarsimanngimmat. Rio-miilli ilikkagassaq Sisimiunut apuuttooq tassaavoq aningaasaliisarnerni piujuaannartitsinernut siunertallit salliunneqartarnissaat. Ajornartorsiutinik ullumikkut qaangiiniarnitsinni iliuutsigut siumut isigisassapput. Piujuaannartumik tunngavillit akisuujusariaqanngillat. Ungasissoq isigalugu taanna allatut ilioriaaseq aningaasanik atuinannginneruvoq.

- Aningaasalli suut tamaasa akilersinnaanngilai. Aningaasaqarnermut ministerilluunniit tamanna nalunngilaa. Taamaattumik aalajangerneqarpoq nunat ataatsimut tamarmi aningaasaqarniarnerata naatsorsorneqartarnerata (BNP) naatsorsorneqartarnera allanngortinneqassasoq, taamaalilluni avatangiisinik innarliisarnerit pinngortitallu pisuussutaanik ”innarliisut” BNP-p naatsorsorneqartarneranut ilaatilerlugit. Taannaavoq Rio-miit Sisimiunut tusarliussassaq ukiuni aggersuni eqqortinniagassarput, Maliina Abelsen ilaatigut oqarpoq.