Medinap Kalaallit Nunaat taamaatiinnarpaa
Danskip pop-imik erinarsortartup tusaamasap Nuummi Aasiannilu tusarnaartitsinissani pilersaarutaareersut taamaatiinnarpai
Danmarkimi pop-imik nipilersortartut akornanni piffissami massumani tusaamaneqarnerpaaq Medina, Kalaallit Nunaannut tusarnaartitsiartorluni angalanissaminik taamaatitsiinnarpoq.
Tamanna isumaqarpoq Nuummi aggustip 31-anni tusarnaartitsinissaralua aammalu arfininngornermi septembarip aallaqqaataani Aasianni Nipiaa Rock Festivalimi appinnissaralua taamaatiinnarneqartoq.
Taama puaatsoornartumik nalunaarut tutsiuppoq.
- Medinap festivalertitsinissatsinnut takkussinnaajunnaarneranik nalunaarfigineqarnerput pakatsissutigisorujussuuarput, Peter Olsen Nipiaa Rock Festivalimik aaqqissuisoq oqarpoq.
- Piffissarujussuaq atorlugu Kalaallit Nunaannut tikisinniaraluarparput. Taamaattumik tusarnaartitsinissat qaammammik ataatsimik sioqqullugit taamaatiinnarluni nalunaarutaanut oqaasissaalatsivugut, Peter Olsen knr.gl-imut oqarpoq.
Medinap Kalaallit Nunaannut angalanissani taamaatiinnarpaa nunatsinni tusarnaartitsinissagaluani sioqqutitsiarlugu Tysklandimi tusarnaartitsinissani pissutigalugu. Medinap paasisimagunarpaa nunatsinni tusarnaartitsissagaluaruni angumeqqussinnaanani, knr.gl allappoq.