Danmarkimi nuna sajuppoq

Ataasinngormat ullaaralaakkut qallunaarpassuit nunap sajunnera itissutigaat. Ukiummi tallimat ingerlaneranni Danmarkimi pingajussaanik nuna sajuppoq Richterip uuttuutaa malillugu 4-mik sinneqartoq, tamannalu Danmarkimi qaqutigoortuuvoq.

Danmarkimi nunap sajunnera pivoq uullaaralaakkut tallimat sioqqullugu 4,4-millu sakkortutigaluni, taamaalilluni Danmarkimi nunap sajuttarnerisa sakkortunersaasa ilagalugu.

- Nunarsuarmi tamarmi nunap sajuttarneranut naleqqiullugu sakkortunngikkaluarpoq, Danmarkimili sakkortoqaaq, GEUS-imi ilisimatooq Trine Dahl-Jensen oqarpoq.

- Nunap taama sakkortutigisumik sajuttarnera akuttuvoq, Danmarkimilu 4 sinnerlugu sakkortutigisumik nunap sajuttarneri ikuttuararsuupput, nangippoq.

Nunap sajunnera pivoq Kattegatimi qeqertamiit Anholtimiit kujammut timmut 20 kilometerinik ungasitsigisumi Danmarkimi Sverigellu kujataani inuit itertillugit.

- Sinittarfitta matuata tunuaniittup manissaaviup iikkamit centimeterialunnik sajuppalunnera itissutigaarput. Uppeqqunagu makilluta qajannaaqqaarparput, Laura Trudsø Holbækip avannaa kitaani Vigimi uini meeqqanilu peqatigalugit najugaqartoq oqarpoq.

- Minutsit tallimat missaanni pigunarpoq, nunalli sajussinnaanera eqqarsaatiginngilluinnarparput. Ilaannikkut Jægersprisimi (sakkutuut sungiusarfianni, aaqq.) seqqorpallattarneq tusaasarparput, qanittumimi sungiusartarfeqarput, taamaattumik eqqumiitsunik tusaasaqartarneq sungiusimallutigu. - Aatsaalli ullaaq tv-kut takutinneqarmat paasivarput nuna sajussimasoq, oqarpoq.

Laura Trudsø nunap sajunneranik misigisaqartuni kisimiinngilaq. GEUS-ip nittartagaa aqqutigalugu ullaaq qulingiuat qeqqaa sioqqullugu innuttaasunit 60-init sinneqartunit nunap sajunneranik misigisaqarsimasunit nalunaartoqareersimavoq.

Sverigemi nutaarsiassaqartitsivik TT aamma nalunaarpoq Sverigep kujataamiorpassuit nunap sajunneranik itertinneqarsimasut.

Danmarkimi akuttunngitsumik nuna sajuttarpoq allaami ukiut tamarluinnaasa qulit tungaannut akulikitsigisumik, amerlanertigulli ima sakkukitsigisarput inunnit ikittuinnarnit malugineqarlutik imaluunniit malugineqaratik. Ukiunili kingullerni tallimani marloriarluni Danmarkimi nuna sajussimavoq inuppassuarnit malugineqarsinnaasumik.

2010-mi Jyllandip kitaani nuna sajuppoq Thyp eqqaani 4,7-mik sakkortutigisumik, decembarimilu 2008-mi Skånep avataani nuna 4,8-mik sajuppoq Danmarkip kangiata ilarujussuarni malugineqarsinnaasumik.

Danmarkimi nunap sajuttara peqquteqarpoq nuna sananeqaatimigut ima aporaatsigigaangat allaat nikittarlutik. Tamassumali sumerpiaq qaqugulu pinissaa siulittoruminaattarpoq, Trine Dahl-Jensen nassuiaavoq.

- Danmarkimi sumerpiaq qaqugulu nunap sajunnissaa siulittorsinnaaneq ajorparput. Nunammi sajuttarneri malugisavut nunap immikkoortuisa marluk eqqaaniinneq ajormata suli tamanna nassuiaruminaanneruvoq, oqarpoq.