USAmi Taekwon-do-mi angusat pitsaasut
Lauritz Heilmann tul-imi kuultinnappoq - frikampimi siilvinnalluni New Yorkimi ITF Taekwon-do Championship ingerlanneqarnerani
Big Apple International ITF Taekwon-do Championships ippassaq arfininngornermi New Yorkimi USA-miittumi unammersuarnerit arfineq-pingajussaanik ingerlanneqarnerat aallartippoq. Kalaallit Nunaannit Elite Sport Greenland sinnerlugu Lauritz Heilmann aallartitaavoq.
Ulloq unammiuaarfik siulleq Lauritz Heilmann tul-imi angusassat pitsaanersaannik angusaqarpoq. Lauritz 6. Dan-ini peqataavoq, taamak qitequtillit tul-imi unamminerat qaffasinnerpaavoq, aamma 64 kilonik oqimassusillit akornanni (akunnattumik oqimaassusillit). Peqatasut makkunannga aggerfeqarput USA, Canada, Mexico, Hondoras, Puerto Rico, Grenada, England, Uzbekistan aamma India.
- Ulloq unammillernartoq. Europami periutsimit allaanermik unamminerit ingerlanneqarput. Divisionit tamarmik knock out-ertoqarnissaa anguniartarpaat, taamaattumik divisionimit assingusumi unammisut tamaasa naapissinnaavatit, Lauritz Heilmann oqarpoq.
- Neriuutigisimagaluarpara Europami nunanit kangillernit amerlanernik peqataasoqarnissaa, unammiuaarneq una atorlugu World Cupimut decembarimi 2012 St. Petersburgimi ingerlasussamut piareersarnisara kissaatigigaluarakku.
- Lauritzip angusaasa takutippaat Lauritz suli klassimini pitsassuusoq. Nuannerluinnarpoq Kalaallit Nunaat nunarsuarmi unammisartut akornanni inissinneqaqqimmat. Nunarsuarmi nunat killit akornanni unammersuarnerni peqataatinneqartarnerput akuttuvoq. Tamanna ilaatigut tunngaveqarpoq amerikap nunavittaanut angalanerup akisuallaarujussuarnera, Morten Holm oqarpoq taanna Grønlands Taekwon-Do Forbund sinnerlugu angalaqataavoq unammersuarnerni unamminernik nakkutilliisutut atuulluni.
Lauritz Heilmann aamma Morten Holm tekinikki pillugu ataatsimeersuarneq peqataaffigissavaa, taanna Grandmaster Rivieremi ingerlanneqassaaq, taanna International Taekwon-Do Federationimi vice presidentiuvoq.