Taamaattumik timmisartorsuaq kinguaattoorpoq
Arfininngornermi Air Greenland assigiinngitsunik kipiluttunartorsiorpoq tamaattumik timmisartuutileqatigiiffiup Airbus-ia nal. ak. qulinik kinguaattoorluni Københavnimut apuuppoq
Air Greenland-ip ilaasui arfininngornermi Kangerlussuarmit Københavniliartut danskit illoqarfiisa pingaarnersaanni nal. ak. qulit kinguaattoorlutik apuupput.
Tamanna pillugu maani aaqqissuisoqarfimmit mail-i pissarsiaraarput, nassiussisup kinguaattoornerup nassuiarneqarnissaanik piumasaqartoq.
Apeqqut Air Greenlandimi tuniniaanermik saqqumilaarnissamullu pisortaanermut Jesper Kunuk Egedemut ingerlateqqipparput.
- Kinguaattoorneq pissuteqarpoq siullermik Nuummi pujornerata angallannermikk kinguaattoorfiunera. Kingorna Ilulissani Dash 7 ajornartorsiuteqalerpoq taamallu Dash 8 Nuummi ajornartorsiuteqarluni. Timmisartorsuit sapaammi ataasinngornermilu Danmarkiliartussat tamarmik ulikkaaqammata aalaajangiupparput ilaasussat 130-t utaqqisinnissaat, taamaaliunngikkutta arfininngornermi Danmarkimut anngussimanavianngikkaluarmata, Jesper Kunuk Egede nassuiaavoq.
- Allanik periarfissaqannginnassi?
- Periarfissarisinnaavarput Kalaallit Nunaata sineriaani Air Greenlandip ilaasussai 130-t utaqqisinnissaat, taava taakkua arfininngornermi sumunnarfimminnut apuussimassanngikkaluarput. Sapaammi ataasinngornermilu timmisartorsuit tamarmik ulikkaaqqammata sapaatip akunnerata naanerani Nunatsinni sumiiffinni assigiinngitsuni aallanngitsoortut allanik aqqutissarsinissaat ajornakusuussagaluaqimmat.