Ivalu on Ice
Ivalu Christensen, Aasiaat akunnerni makkunani Canadamut timmisartortoq ilinniartut aasaanerani ilisimasassarsiorlutik angalaneranni peqataajartorpoq silap pissusaata allanngoriartorneranik paasisassarsiorluni
Inuusuttuaqqat 75-it nunarsuarmit tamalaaneersut ulluni 14-ini Nunavut, Canada aamma Kalaallit Nunaata avannaata kitaani angalaassapput avatangiiseq aamma silap pissusaata allanngoriartornerannik ilinniarlutik. 17-inik ukiulik Ivalu Christensen, Aasianneersoq kalaallinit kisiartaalluni canadamiut ilisimatusaataannik "ekspedition" peqataaffigissavaa.
- Qilanaartorujussuuvunga Issittumi silap pissusaata allanngoriartornerannik kingunerit takussavakka. Sikup aappallaannginnerani takunissaa naatsorsuutigaara, Ivalu Christensen Sermitsiaq.AG-mut oqarpoq.
- Apriilimi Sermitsiaq.AG-mi allaaserisaq atuarpara ingerlaannarlu ”Students on Ice” qinnuteqaammik nassitsiffigalugu. Angajoqqaakkalu akia unissutigigaluarparput, paasitinneqarpungali nunatsinneersumut angalaneq akeqanngitsoq, Ivalu Christensen oqaluttuarpoq, taanna Københavnimi 2009 meeqqat silap pissusaa pillugu ataatsimeersuarnerannut peqataatinneqarpoq. Arnap inuusuttunnguup avatangiiseq aamma silap pissusaanut tunngasut suulluunniit soqutigisorujussuuai. Ilinniarnertuunngorniarfimmi naammassiguni nukissaq avatangiiserlu qaffasinnerusumik ilinniarfigerusuppai.
- Naatsorsuutigaara Aalborg universitetimi energi- og miljø HTX naammassigukku atuarnissai, Ivalu Christensen oqarpoq, taanna aggustip 13-ianni ukiut aappassaannik HTX-imik ilinniarnini Sisimiuni nangissavaa.
Umiarsuakkut ilisimasassarsiorluni angalaneq canadamiut kikkunnulluunniit attuumassuteqanngitsut ”The Students on Ice” suliniaqatigiiffiannit Verdensnaturfondenimit WWF Canadamit aningaasalersorneqarluni. Umiarsuaq Canadami Iqalunnit aallassaaq Nunatsinni Kangerlussuarmi aggustip aqqaneq-aappaanni naammassissalluni.
Angalanermut kalaallit nunaata peqataatitassaa marsimi WWF Canadamit innersuussutigineqarpoq, angalaqataaneq 9.500 canadamiut dollariannik, tassa ilinniartumut ataatsimut peqataaneq 57.000 koruunit missaannik akeqarpoq.
- Ilinniartorpassuit pisortanit aningaasaateqarfinnillu namminersortunit taperneqartut, Niki Trudeau, ”Students on Ice”-imit Sermitsiaq.AG-mut ullumi oqarpoq.
- Inuit inuusuttut 30 missaat peqataassapput, taakkua Nunavummit North West Territoriesinillu aggerfeqarput, ilisimasassarsiornerullu ingerlanerani Issittumi inuiaat inuit allat pillugit annermik ilinniagaqassapput imminnullu assersuussinnaanerulissallutik, ”Students on Ice” ilisimatitsivoq.
- Uagut inuiattut ataatsimut pinngortitatulli allanngoqatigiissaagut? aappiussappat inuusuttut qanoq allanngussappat aamma nunarsuaq qanoq allanngussava? ”Students on Ice” ilisimatitsivoq.