Niuertarfeqarfissuup ammarneranut inuppassuit najuukkiartorput

Nuuk Center nutaarsuaq ullumi illoqarfimmi innuttaasunit pigiliunneqarpoq. Kikkulluunniit najuupput ullorlu tamaat najuutissallutik.

Ipadinik akikitsunik neqeroorutit iterialluusunik ulapisitsipput inuppassuillu Ipadimik pissarsiniarlutik Elgigantenip nutaap silataani utaqqerrapput, pisiniarfiup nunguutsisimanerminik nalunaaruteqarnissaa sioqqullugu.

Pisiniarfiit amerlanerpaartaat ullaaq ammaanermi neqeroorutitsialannik ussassaaruteqarput, tamakkualu inuppassuarnit akissarseqqammersunit soorunami ussagarneqarluarlutik.

Borgmester Asii Chemnitz Narup inuppassuarnut takkussimasunut oqalugiarpoq.

Nuuk Centerforening aamma MT Højgaard suliarinnissimasut pilluaqquai.

- Niuertarfippassuit maannakkut Niuertarfeqarfissuarmi illoqatigiilersut annertunerusumik ataatsimooqatigiinnikkut pitsaaqutissanik iluanaaruteqarumaartut neriuppunga, soorlu pinnersaanernut ilinniartitsinernullu - iluatsitsilluarnissassinnik tamassi kissaappassi, oqarpoq nunatsinnilu niuertarfissuit nunap iluani biilinut inissiisarfittallit siullersarigaat oqaatigalugu.

- Sanaartukkamik matuminnga naammassinninnikkut Nuup Kommunerisimasaani maanngaanniit Katersortarfiup tungaanut portusuunik malunnaateqartunillu sanaartornissamik ungasinnerusoq isigalugu pilersaarutit naammassineqarput – tamakku Hotel Nuuk aallartiffigaat maannakkullu Nuummi Niuertarfeqarfissuarmik inaarneqarlutik.

Læs også "Nuuk Center åbner i dag"

Læs også "Nuuk Center sekunder fra åbning"

Illoqarfik uummaarissoq

- Illoqarfipput Nuuk illoqarfiussaaq uummaarissoq – inunnut najoruminartoq, inuit akornanni naapeqatigiinnissamut pitsaasunik periarfissiisoq.

- Imanermi illoqannginnersat anginngitsut arfineq marluupput. Taakku atorluarlugit sapanngatut pinnersutut nuillugit inuit katerittarfissaattut Kommuneqarfik Sermersuumit pilersaarutigaagut.

- Katterittarfik Amisut 2009-mi Namminersulernitta ulluani atoqqaartipparput, katerittarfiullu taassuma illoqarfitsinni nuannersumik inooqatigiinnissamut qanoq pingaaruteqartiginera malunniuteqarlualereerpoq, borgmesteri oqarpoq.

Niuertarfeqarfissuup silataa aamma alianaarsarneqartussaavoq. Borgmesteri neriuppoq illorsuup silataata iluatungaatalu ataqatigiissutut pilersinnissaat torrallanneqarumaartoq.

Kinguaariippassuit illoqarfiat

- Nuuk ”kinguaariippassuit illoqarfigaat”, innuttaasut assigiinngisitaartuunerannik ilisarnaaterpassuit ilaattut. Meerartavut peroriartorumaarput niuertarfeqarfissuaq sungiusimalluarlugu.

- Aammali kinguuareeqarpoq inuiaqatigiinni aamma namminersorluni inuussutissarsiuteqarnermi ineriartornernut peqataalluarsimasunik, KGH-p kisermaassisuuneranik aamma 1953-imi kisermaassiunnaarneranik eqqaamasaqartunik.

- Nuummi kinguaariinni utoqqartatta eqqaamalluarpaat nikorfaffipput manna Aantukaasiup illoqarfiatut. Aantuukasik nukappiatoqaasimavoq, taamanikkut nukappiatoqqanut atugassarititaasunik tamanik atugaqarluni immikkullu ittunik ilisarnaateqarluni inooqataasimasutut eqqaamaneqarpoq.

- Taamaalilluni sumiiffik manna Nuummiunit taaneqartarpoq ’Antuukasik’-mik, borgmesteri oqarpoq, taamaalillunilu centeri kalaallisut nutaamik atserlugu.

- Nuummi Niuertarfeqarfissuup/ Aantuukasiup atulernerani illoqarfimmi niuertarfiuteqarnikkut pissutsinut nutaanut alloriartoqarpoq – siulivut eqiasuillutik sulilluarnermikkut ullumikkut nutaaliortoqarsinnaaneranut tunngavissiisimasut ataqqillugit qujassuteqarfigaavut, borgmesteri oqarpoq.

Tamatuma kingorna Centerforeningip siulittaasua Ittu Hviid peqatigalugu illoqarfiup niuertarfeqarfittaava pingasoriarluni hurraarutigaa.

Sermitsiaq.AG ullumi kingusinnerusukkut ammaanersiornermit assilisanik saqqummiussiss.