Skip to main content

Tartupaluk tikinngiinnarpaat

Qallunaat umiarsuarmut takornariartaammut ilaasut 112-t Tartupaluk nunatta avannarpiaaniittoq sikunik tikissinnaanngilaat. 2014-imi misiliisoqaqqissaaq

Umiarsuaq takornariartaat Clipper Adventurer qallunaanik takornarianik 112-nik ilaasoqarluni qeqertamut akerleriissutaasumut Tartupalummut nunatta Canadallu akornanni ikermi Nares Strædemiittumut anngunniaraluarnermini arfininngormat taamaatitsiinnarpoq.

Ikeq suli sikuuvoq, taamaattumillu sikunik aserorterussuaqanngikkaanni tamatuma angallaviginissaa ajornarluinnarluni, angalaqatigiinnut aqutsisoq Axel Fiedler nunatta avannaarsuanit ilisimatitsivoq.

Takornariaq angalatitsivik Albatros Travel aqqutigalugu angalapput. Tallimanngornermi unnukkut umiarsuup nunatta kippasinnersaa Kap Alexander avaqquppaa tassanngaanniillu qeqertamut 1,3 kvadratkilometerinik angissusilimmut Tartupalummut avannamut ingerlaqqilluni.

Qeqertaq 1873-imi Hans Hendrimmut Qeqertarsuatsiaaneersumut atsiunneqartoq Danmarkip Canadallu akornanni killeqarfilerngusaassutigineqarpoq, qeqertat taakkunannga tamanit pigiumaneqarmat.

Tamanna pingaartumik tamaani aatsitasaqarsinnaaneranik pissuteqarpoq.

Tartupalummut eqqortumut taarsiullugu qallunaat takornariat qeqertamut mikinermut taamatuttaaq ateqartumut Nares Strædemi 150 sømilinik kujasinnerusumiittumut nunalipput. Tassani qeqertap portunersaani inussummik nappaapput.

Albatros Travel 2010-mi iluatsitsineruvoq umiarsuup Ocean Novap qeqertaq avannaarsuaniittoq tikimmagu.

Tartupaluk nunat qeqertalerngusaattut marluk pisortatigoortumik sinniisuinit siusinnerusukkut tikinneqartarpoq.

Danmarkimi sakkutuut imarsiortut qeqertamut Dannebrog napparlugulu puiaasaq Gammel Dansk inissisimavaat, Canadamiullu sakkutuui akillutik erfalasuminnik nappaasimallutik puiaasamillu Canadian Clubimik inissiisimallutik.

Albatros Travel 2014-imi Tartupalummut misileeqqinnissamik pilersaaruteqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER