Skip to main content

Makrelilerngusaanneq naammassinialerunartoq

Kalaallit Islandimiullu makrelit islandimi tulaanneqarsinnaannginnerannik assortuunnerat naammassinialerunarpoq. Polar Seafoodip siulittaasua Henrik Leth neriulluarpoq 

Polar Seafood aamma Royal Greenland ulluni kingullerni soriarsinnaasimanngillat makrelilerngusaannermik taasaq pissutigalugu, taanna aallartippoq Islandip inatsit 1998'imeersoq atorlugu Kalaallit Nunaata makrelimik tulaassinissaa inerteqqutigimmagu, aalisagaq taanna Kalaallit Nunaata Aningaasaqarnerata Killeqarfiani pisarineqarsimasoq Islandimi umiarsualivimmut eqquteqqusaanngimmat. 

Sammisami nikeriarfissaarunnerigaluaq ammariartorpasippoq nunammi sanileriit marluk akornanni pisoq nuannarineqanngillaq. Makrel'it pillugit assortuunneq Kalaallit Nunaata Islandillu akornanni akaareqatigiinnermik innarliileraluarpoq, kisiannili islandimiut aalisarnermut naalakkersuisuata Steingrímur Sigfusson namminersorlutik oqartussani aalisarnermut naalakkersuisumut Ane Hansenimut akissutaagut allamut sangutinneqarpoq. 

Steingrimur Sigfusson akissuteqaammini allappoq, kalaallit makrelianik tuninisisinnaaneq immikkut pisoqartillugu akuerineqartariaqarsinnaasoq taamaattorli suliamit suliamut naliliisoqartassasoq.  

Tamanna isumaqarpoq Polar Seafoodip kilisaataataa Erika Ammassalimmeersoq aamma islandimiut kilisaataataat marluk Royal Greenlandimit attartugaasut oqaatigineqartut tunngavigalugit kalaallit makreliannik tunisinissaminnut akuerineqaratarsinnaasut. 

- Qularutigivallaanngilarput Kalaallit Nunaata pisariaqartitaanik inerniliisoqarnissaa. Imaassinnaavoq inatsisit pisoqqat eqaappallaanngitsut piffissamik silallu pissusaata allangoriartorneranut malinnaasimanngitsut. Kisianni taava Islandimi periarfissaqarpugut, Henrik Leth oqarpoq, taassuma Savalimmiut aamma eqqarsaatiminiitsippaa. 

Polar Seafoodip kilisaataataa Erika makrelinik 600 tonsinik Islandimi tunisiniaraluarluni itigartitaamat umiarsuaq Savalimmiunut ingerlaqqippoq, taamallu pisoqartassaaq Islandi qitulinngippat. 

- Uagut aamma Royal Greenland tamatta makrelinik aalisarnermik misileraanermi 2000 tonsinik pisassinneqarpugut. Aamma pisariaqarfiatigut pisassatta qaffanneqarsinnaanera neriorsuutigineqarpoq, Henrik Leth oqarpoq ilallugu:  

- Uagutsinnut pingaarutilik tassa kalaallit imartaani makreleqarnersoq aammalu peqarpoq, Polar Seafoodimi suliutigaluni siulittaasuusoq oqarpoq, taanna aamma East-Greenland Codfishimi Erikamik piginnittuni pisortaaneruvoq. Polar Seafood piffissaq ungasinngitsoq tikillugu umiarsuaatileqatigiiffimmi Ammassalimmi angerlarsimaffeqartumi amerlanerpaanik aktiaateqarpoq. Erikamut suliffeqarfinnik 20nik naleqarpoq taakkua Tunumi illoqarfimmi nalitoqaat. 

Makreli pillugu assortuunnerup tunuliaqutaa sapaatip akunnerani Sermitsiami saqqummersumi annermik paasisassarfiorfigisinnaavat: Aviisi elektroniskiusoq uani aamma pisiarisinnaavat: 

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER