Skip to main content

Grønland ramt af makrelkrigen

Kalaallit kilisaataat Islandimi makrelinik tunisisinnaanngilaq. Aalisarnermut naalakkersuisoq Ane Hansen akerliliivoq 

Kilisaat "Erika" Tasiilami angerlarsimaffeqartoq ullumikkut marlunngornermi paasitinneqarpoq Islandimi makrelinik usingiaasinnaananilu tunisisinnaanngitsoq.

Erika nunatta aningaasaqarnikkut killeqarfiani misileraalluni aalisarpoq, suullu tamarmik ajunngitsumik ingerlapput. Kilisaat makrelinik 550 tonsinik usivoq. Aalisakkat nutaajupput tuaviornerpaamillu tunineqartariaqarlutik kilisaat qerititsinissamut inissaqanngimmat. 

Aalisariutaatikkit naatsorsuutigisimagaluarpaat Islandimi tunisisinnaassallutik, soorlu aamma sungiusimaneqarluni pisaat allat tunineqarlutillu usingiarneqartarnerat. Taamaattumik aalisariutaatillit tupaallaatigaat Islandimiit itigartinneqaramik. Maannakkut pisaat Savalimmiuni tuniniarneqarput. 

Ane Hansen nassuiaanneqaruppoq
Aalisarnermut naalakkersuisoq Ane Hansen, IA, suliamut akuliunneqarpoq, Islandimilu aalisarnermut naalakkersuisoq attaveqarfigalugu nassuiaateqaqqullugulu. 

Ilaatigut tunngavilersuutigaa Island nunarpullu 1998-miilli aalisarnermik isumaqatigiissuteqarsimasut aalisarnikkut ikioqatigiittarnissamik. 

Misileraalluni aalisarneruvoq naalakkersuisoqarfianit akuerineqarsimasoq. 

Kilisaat East Greenland Cod Fishimit pigineqarpoq, aammalu 66 procentia Polar Seafoodimit pigineqarluni, 33 procentillu Islandimiunit pigineqarluni. Ungasinngitsukkut Polar Seafoodip Flemming Nikolajsenip piginneqataassutaa pisiaraa, Polar Seafoodillu siulersuisuini siulittaasoq Henrik Leth suliffeqarfimmi pisortanngorluni. 

- Polar Seafood aaqqiiniarluni ilungersorpoq taamaattumik aneriarfissatut kingullerpaatut Savalimmiuni tulaassisoqarniarlerpoq makrelit usit nerineqarsinnaassappata, Henrik Leth Sermitsiaq.AG-mut oqarpoq.  

– Aalisakkat imaanut igissinnaanngilagut. Tamanna inerteqqutaavoq, oqartariaqarpungali Islandimi susoqarnersoq paasinnginnakku. Maannakkut Islandimiut nammineq nunatsinnut pissusilersuutaa allaanngilaq namminnerminnut EU-p pissusilersorneratut ittoq. Marloqiusumik pissusilersorneruvoq, Henrik Leth oqarpoq. 

Makrelilerngusaanneq
Kalaallit kilisaataataat piumassuserinngisamik Islandimiut makrelilerngusaanneranut inissippoq. 

Island imartamini makrelinik pisarniarpoq nammineerlunilu pisassissimalluni. 

Ices (International Council for the Exploration of the Sea Københavnimi angerlarsimaffeqartoq Atlantikup avannaani aalisagaqassutsip annersaanik siunnersuisartoq) tamakkiisumik pisassiisarpoq, taakkulu Den Nordøstatlantiske Fiskerikommissionimi NEAFC-mi nunat tallimat akornanni isumaqatigiissutigineqareerluni agguaanneqartarpoq. Norskehavetimi nunat tallimat akornanni isumaqatigiinniarnerit Ruslandip, Norgep, EU-p, Savalimmiut Islandillu akornanni pisarput. 

Makrelilli Islandip imartaanut ingerlaartarmata Islandimiut amerlanernik pisassinneqarusupput. Tamanna isumaqatigiinniaqataasunit tusaajumaneqanngilaq, taamaattumik Island namminersorluni makrelinik pisassippoq. Savalimmiormiut aamma taamaaliorput nammineerlutik pisassillutik. 

Taamaattumik Norgep EU-llu Islandimiit makrelinik tunisisinnaaneq mattuppaat. 

Illuatungaatigut Islandimi nunat allat aalisariutaat makrelinik tuniseqqusaanngillat, Island nunat tallimat isumaqatigiinniarneranit NEAFC-mit anisimammat. Taamaattumik kalaallit kilisaataat Islandimi makrelinik tunisisinnaananilu usingiaaqqusaanngilaq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER