- Nipilersornermik aallussinerput ajortoqarpoq
Nipilersortartut saqqummersitsisartullu ullut tamaasa aningaasarsiassaagaluaminnik annaasaqartarput inatsisiliorneq malinnaanngimmat, Steen Lynge Atassut isummesorpoq
- Nipilersukkanik saqqummersitsisarneq sinneqartoorluni ingerlanneqarsinnaanngilaq pissutigalugu ukiuni qaangiuttuni cd'nik tuniniaaneq appariarujussuarmat. Maannakkut imminut akilersinnaanngilaq nipilersukkanik cd'nik saqqummersitsineq.
Taama inerniliivoq Steen Lynge Atassut Nuuk.
Taassuma nittartakkami aaqqissuisoqarfimmut oqallisissiaq una nassiuppaa, tamakkerlugu ilanngukkusutarput
" Kalaallit Nunaat nunarsuarmi sumiiffiit ikittuinnaat ilagaat teknikkikkut ineriartornissaminut nunanut allanut naleqqiullugu piareersimalluinnartoq. Tamanna innuttaasut ikinnerannik tunngaveqarpoq aamma taamaattumik teknologi nutaaq siarualertortarpoq. Tamanna Kalaallit Nunaanni nipilersornermik ingerlatsisut akornanni atuuppoq.
Ullumikkut cd'nik nipilersukkanik imalinnik saqqummersitsineq akilersinnaanngilaq teknologiikkut ineriartornerup nassataanik, pissutigalugu amerlanerpaat nipilersukkanik kopeerisinnaanngornikuummata mobiltelefonit qarasaasialluunniit aqqutigalugit.
Taamaattumik pingaaruteqarpoq inatsisiliorneq nalimmassassallugu imaasillugu, kalaallit nipilersugaanik saqqummersitsinermi aqqutinik allanik nassaarniartoqartariaqartoq, kingumut nipilersortartut aamma saqqummersitsiviit akilersinnaasumik nipilersukkanik immiussillutillu saqqummersitsisinnaaqqullugit. Tamatuma saniatigut nipilersornermik ingerlatsisut teknologiip pioreersup iluani nalimmassartariaqarput.
Kalaallit kulturiat nipilersorneq aqqutigalugu nukittorsarli
Nipilersukkanik aamma atuakkanik saqqummersitsinerit kalaallit oqaasiinik nukittorsaallutillu ineriartortitseqqittarput. Naalakkersuisut naleqqutinngitsunik oqaatsit pillugit inatsimmik allanngortiterinatik inatsisiliortariaqaraluarput, nipilersortartut Tele Greenland aqqutigalugu nipilersukkaminnik saqqummersitsisinnaanngornissaannut periarfissiisoq.
Ullumikkut nipilersortartut saqqummersitsisarfiillu pisinnaatitaaffii ataqqineqanngillat illuartinneqartuarlutillu. Nipilersortartut saqummersitsiviillu ullut tamaasa aningaasarsiassaminnik annaasaqartarput inatsisiliornerup malinnaannginnera pissutigalugu.
Nipilersornermik aallussisut Naalakkersuisunit pingaarnertinneqarnerusariaqarput ajornartorsiutaannillu aniguisitsiniaasoqarluni, teknologiip nutaap atuutilernerata nassatarisaanik atuutilernikut. Inatsisit nalimmarsarnerisigut nipilersortartut aamma saqqummersitsiviit periarfissinneqassapput illersugaanerisa uterteqqinneqarnissaa, tamatuma saniatigut nammineq nipilersuutinik saqqummersitsisarnerup akilersinnaasunngorteqqinneqarnissaa. Nipilersukkanik tusarnaartartut ullumikkornit pitsaanerusumik periarfissinneqartariaqarput kalaallit nipilersugaannik atuinissaannut aamma pisinissaannut", Steen Lynge allappoq.
Steen Lynge isumaqatigaajuk? Imaluunniit illit qanoq isumaqarpit?