Skip to main content

Nuummi uumasuutinik takutitsineq

Nunatsinni UUmasut Ikinngutaasa neriuutigaat aaqqissuussineq aappaagu ingerlateqqinneqarumaartoq, ukioq manna siullermeersoq 

Nunatsinni Uumasut Ikinngutai uumasuutinik takutitsinermik ingerlatsiniarpoq Nuummi sapaammi aggustip ulluisa 19-ianni 2012 uumasut illuata Nuukullak 34-p eqqaani.

Uumasuutinik takutitsineq tassaavoq uumasuutinik saqqummersitsineq assigiinngitsunik aamma unamminernik ingerlatsisoqassaaq. Assersuutigalugu Nuummi qimmit inequnarnersaat, qitsuk sorleq qitunnerpaanik meqqoqarpa aamma kaniina sorleq takinerpaanik siuteqarpa?

Uumasunik takutitsineq Poul Thomsen-mit ammarneqassaaq. Taanna ukiorpassuarni Danmarkimi uumasunut tunngasunik aallakaatitassianik ingerlatsisarsimavoq, soorlu aallakaatitassiat “Dus med Dyrene”, “En naturlig forklaring” aamma “Hund og hund imellem”. Poul Thomsen ullup ingerlanerani nalorsittaarissaaq taamaattumillu holdinik sisamanik ujaasivugut peqataarusuttunik, tassa anaanaq, ataataq, meeraq aamma qimmeq. Kalaallit Nunaanni Uumasut Ikinngutaasa nittartagaanni nalunaartoqarsinnaavoq.

Nuummi uumasut takutitsinermut unammisitsinernullu peqataasinnaapput. Ullup ingerlanerani unamminerit ingerlanneqassapput, politiit aamma ilanngaaserisut qimmitik takutitsitissavaat. Tamatuma saniatigut aliikkusersuinerit assigiinngitsut ingerlanneqassapput, soorlu qarsunik eqquiniaaneq, tombola il.il. pølsinik, kaffimik kaaginik aamma allarpassuarnik tuniniaasoqassaaq.

- Ilisimasagut malillugit aatsaat siullerpaamik Nuummi uumasuutinik takutitsineq ingerlanneqassaaq. Neriuutigaarput iluatsilluarnissaa pisoq aappaagu ingerlateqqinniassagatsigu, Harry Holm suleqatigiissitameersoq oqarpoq, uumasuutinik takutitsinissamik aaqqissuussineq maajip naalerneraniit piareersarlugu aallartinneqarpoq.

- Assorujussuaq nuannaarutigaarput Poul Thomsen uumasunik takutitsinissamut peqataanissamut akuersaarsimammat. Inuppassuarnik nuannarineqaqaaq peqataaniarneralu immikkuullarissuulluni.

Nuuk TV suleqatigalugu uumasuutit assilillugit assilisat unammititsissutigineqarput. Unammititsinermut kikkut tamarmik peqataasinnaapput, ilanngunneqarsinnaapput Nuummi uumasuutit assingi inequnartut, quujanartut aamma kusanartut. Assilisat juulip ulluisa 20-t tikillugu nassiunneqarsinnaapput, tamatuma kingorna assit pitsaanerpaat unammititsinermi ingerlaqqissapput, tamakkulu aggustip ulluisa qulingat tikillugu Nuuk TV-mi takutinneqartassapput. Tamatumunnga ingiaqatigitillugu Uumasut Ikinngutaasa nittartagaanni ajugaasussarsiorluni taasinerit ingerlanneqassapput. Ajugaasut uumasuutinik takutitsinermi toqqarneqassapput.

- Nuummi tusindinik arlaqartunik uumasoqarpoq taamaattumik neriuutigaarput aaqqissuussinermut peqataasoqarluarnissaa – saqqummersitsisunik aamma isiginnaariartunik. Atortussanik, tupernik, biilersuarnik lastilinnik aamma aaqqissuussinermut iluaqutissanik assigiinngitsunik akeqanngitsumik atortinneqarpugut, taamaattumik saqqummersitsinermi aamma unammititsinermi peqataaneq akeqanngilluinnarpoq, Harry Holm oqaluttuarpoq, nuannaarutigaalu suleqatigiissitap ikiuerusuttunik manna tikillugu saaffigineqarsimanera.

Nuummi Uumasuutinik Takutitsinerup pilersaarutaa uani http://dyrenesvenner.gl/nuuk-dyrskue-2012pissarsiarineqarsinnaavoq, tassuuna aammattaaq uumasuutit peqataanissaat ilanngunneqarsinnaavoq imaluunniit assinik unamminermut nassiussisoqarsinnaalluni. Aaqqissuussineq aamma facebookimi qupperneqarpoq, tassani nutaarsiassat kingulliit ingerlaavartumik nutarterneqarput. Qupperneq nassaarineqarsinnaavoq link una: http://www.facebook.com/NuukDyrskue aqqutigalugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER