Ajornartorsiortut: Politiit oqaannarput iluatsitsilluarisi

Kangerlussuarmi angallassisoq takornariarlu kuup illua'tungaani nikeriarsinnaajunnaarmata politiit ikiuukkumanngillat. Politiilli oqarput ulorianartorsiorsimanngitsut

Jens-Pavia Brandt Kangerlussuarmi politiinit pitsaanngitsumik pineqarsimasutut misigisimavoq, politiilli taamaattoqannginnerarpaat. Ass.: Leiff Josefsen

Sermitsiaq.AG takornarianik angallassisartumit Jens-Pavia Brandtimit, Kangerlussuarmi Greenland Outdoors-imeersumit, oqaluttuaq una tigusimavaa. Kangerlussuarmi ikaartarfiup kuugussaanerata kingorna politiit pissusilersornerat taassuma naammaginngilluinnarpaa. Politiit akissutaat allaaserisap naggataani atuarsinnaavat.

- Juulip 10-anni takornariaq Sverigemeersoq ilagalugu Tasersuatsiamit qajariaqatigalugulu pisuttuaqatigalugulu aallarpugut.

Unnuit tamaasa satellittelefonikkut sianertarpunga suut tamarmik ajunngitsut nalunaarutigalugu. Juulip 11-anni nalunaarfigineqarpunga Kangerlussuarmi ikaartarfik aserorsimasoq taamalu utersinnaanngitsugut. Ingerlaannaq politiinut sianerpunga, naatsorsuutigigakku kuup illua'tungaani nikeriarsinnaanngitsunut ajornartoornermi iliuuseqarnissamut piareersimassasut. Taamaattoqanngilarli!

Juulip 11-anni nalunaaqutaq 23 missaani sianerpunga, telefonilu Kangerlussuarmi Politiinit sukkasuumik tiguneqarpoq. Tupaallaatigisannik kuup illua'tungaani soriarsinnaajunaarsimasut ikiornissaannut piareersimasoqanngilaq. Allaat ilisimatinneqarpunga imminut isumagisariaqartunga, sulilu tupaallaatiginerusannik siunnersorpaannga Kangerlussuaq Tourism-imut sianeqqullunga aaneqarnissannik isumaqatigiissuteqarniassagama.

Kangerlussuarmi kialuunniit (politiit kisimik pinnatik) nalunngilaa Kangerlussuaq Tourism ukiut arlallit matuma siornatigut akiliisinnaajunnaarsimasoq.

Paasiartulerpara sumiginnarneqartugut, tamannali quianaannartingaarakku arlaleriarlunga aperisarpunga: "Taava nammineerluta aniguiffissarsiussaagut?" Tamatigullu akisarpoq: Aap.

Politiilli ajornartoortunut (ikiorusunngikkaluarlugit) misiginneqataarusupput, taamaattumillu oqaloqatigiinneq naggaserlugu: Iluatsitsilluarisi!

Oqaloqatigiinnerup kingorna politiit makkua ilisimanngilaat: Ikiortissarsiorluta ikinngutinut ilisarisimasanullu sianeqattaarnissamut satellittelefonerput naammattumik orsoqarnersoq, kikkuunersugut, sumiinnersugut, qanoq taquaqartiginersugut aammalu imermik pissarsisinnaanersugut. Nunap assiuteqarnersugut, pujorsiuteqarnersugut GPS-eqarnersugulluunniit, nalunnginneripput qanoq isilluta kangerlummut, aaneqarsinnaaffitsinnut, ingerlassanersugut. Ima pitsoritsiginersugut kangerluk angusinnaallutigu.

Allaammi angallataateqartut nalunngisatta telefoniisa normui piginngilavut, isumaqarsimagama politiinut telefonip normua naammassasoq, ajutoornermi ikiorneqarnissamut.

Qujanartumik normut atugassavut pissarsiaraavut isumaqatigiissuteqarpugullu aqaguani ullaakkut kangerlummut aaneqassasugut. Tamannali pissutigalugu sininnata unnuaq naallugu pisuttariaqarpugut.

Qujanartumik takornariaq qasusuilluarpoq qasujaatsorujussuullunilu. Unnuap qeqqaniit ullaakkut 06.30 tungaanut pisuppugut, katillugu akunnerup affaannaani qasuersertarluta. Soorunami immikkut ulorianaateqarpoq qasuersaarnani taama sivisutigisumik unnuaq tamaat pisunneq. Ulortoortoqarsinnaavoq imaluunniit sivingasukkut, aqqutigisariaqakkarsigut ammukarluni naalluni orlusoqarsinnaalluni ajutoorluni. Tuaviorluta kangerlummut apuussinnaaniassagatta atortut amerlanerpaartaat qaqqamut qimattariaqarpavut.

Unnuakkut sivisuumik pisunnitsinni qujanartumik ajutuunngilagut. Qujanartumillu annaassiniariartortup nassaaraatigut. Qujanartumillu ulinngavoq sinerissamut tulassinnaalluni ikiorserlutalu.

Ilumut politiit ikiuunnerusinnaanngillat? Nunami maani politiit ajutoortunik annaassiniarneq suliassarinngilaat? Politiit ikiuiumannginnerat pissutigalugu ulorianartorsiorluta unnuakkut pisuttariaqarpugut, suli ajutoornerunermik kinguneqarsinnaasumik, pisunnitsinnili ajutoorsimaguugutta kikkunnik qaaqqusissagaluaratta? Politiinik? Jens-Pavia Brandt allappoq.

Kangerlussuarmili politiit taamatut oqaluttuarneq ilisarisinnaanngilaat.

- Uanga nammimneq Jens-Pavia oqaloqatigisimanngilara, suleqarpulli oqaloqatiginnittoq isumassiuisorujussuuvoq taamaattumik takorloorsinnaanngilara oqartoqaannartoq "imminut isumaginiaritsi". Tamanna ileqqorinngilarput, inuiaavugut ikiuukkumatuut, Kangerlussuarmi Politiini ulluinnarni pisortaq Brian Rosengren Sermitsiaq.AG-mut oqarpoq.

Tamanna peqatigalugu tikkuarpaa politiit soorunami ikiuutssimassagaluartut inummik piviusumik ulorianartorsiortoqarsimasuuppat.

- Taamaattoqarsimanngilarli, angallammik angerlaanneqarnissaminnut kilometerinik quliinnarnik pisuttussaasimapput, Brian Rosengren oqarpoq erseqqissaallunilu politiit ornigunneq ajortut, assersuutigalugu angallammi motoori unittoorsimappat.

Powered by Labrador CMS